Dýbaıda otandyq startaptarǵa qoldaý kórsetetin IT-hab ashyldy. Qaz Step Innovation Hub IT-jobalarǵa ónimderin álemdik naryqqa shyǵarýǵa, óndirisin alǵa jyljytýǵa járdemdesedi.
Qazirgi ýaqytta platforma 15 otandyq startapqa Taıaý Shyǵys naryǵynda ónimin usynýǵa kómektesken. Qaz Step Innovation Hub-tyń negizin qalaýshy Tımýr Máýleshovtiń aıtýynsha, BAÁ men Taıaý Shyǵys naryqtaryna shyǵý elimizdiń tehnologııalyq eksportyna serpin beredi.
– Hab otandyq IT-kompanııalarǵa jańa seriktester men ınvestorlar tabýǵa kómektesedi. Keıingi 5-7 jylda sheteldik venchýrlyq qorlar men halyqaralyq bıznes-qoǵamdastyq ókilderi elimizdiń IT-ónimderdi eksporttaý salasyndaǵy áleýetin baıqaı bastady. Sondyqtan biz otandyq startaptarǵa BAÁ men Taıaý Shyǵystyń qarqyndy damyp kele jatqan naryǵynda ózderiniń joǵary áleýetin kórsete alatyn qolaıly ortany quratyn bolamyz. Osylaısha, Qaz Step Innovation Hub otandyq IT-qyzmetterdi álemdik naryqqa shyǵarady, – deıdi ol.
«Qaz Steppe» ınnovasııalyq habynyń ashylý saltanaty Dýbaıdaǵy Qazaqstan saýda úıiniń pavılonynda ótti. Perspektıvaly otandyq startaptar habyn iske qosý rásimine Saýda jáne ıntegrasııa mınıstri Arman Shaqqalıev qatysty. A.Shaqqalıevtiń aıtýynsha, bizdiń memleket sıfrlyq salany yntalandyrý saıasatyn ustanady. 2023 jyldyń qorytyndysy boıynsha qazaqstandyq IT-qyzmetter eksporty 500 mln dollarǵa jetti. Otandyq IT-salanyń áleýetin barynsha iske asyrý úshin Saýda úıiniń pavılonynda startap-qoǵamdastyqtyń bastamasy boıynsha kovorkıng-ortalyq iske qosylady.
«Qaz Steppe Innovation Hub mamandandyrylǵan alańy qazaqstandyq IT-qyzmetter sektoryn halyqaralyq naryqtarǵa jyljytýǵa, Qazaqstan men BAÁ isker toptarynyń múddelerin biriktirýge yqpal etedi. Sondaı-aq ózara tıimdi yntymaqtastyqty tıimdi damytýǵa jáne bizdiń IT-kompanııalarymyzdyń básekege qabilettiligin arttyrýǵa múmkindik beredi», dedi mınıstr.
Joǵaryda atap ótkenimizdeı, alań 15 otandyq startapqa Taıaý Shyǵys naryǵynda óz jobalaryn tanystyrýǵa jáne 100 jergilikti jáne halyqaralyq kompanııalardyń ókilderimen ózara is-qımyl perspektıvalaryn talqylaýǵa kómektesti. Olardyń ishinde EMAAR, Etisalat, Google, Microsoft, Mastercard, L’Oreal, Abu Dhabi Commercial Bank jáne basqalary bar. Buǵan qosa, otandyq kásipkerler kásipkerler BAÁ memlekettik organdary men kompanııalarynyń ókilderimen kezdesti.
«Qaz Steppe Innovation Hub Prezıdent Qasym-Jomart Toqaevtyń Qazaqstandy IT-elge aınaldyrý jónindegi alǵa qoıǵan maqsatyn iske asyrýdyń biregeı alańyna aınalady. 2021 jyldan bastap qazaqstandyq startaptar elimizdiń aýmaǵynda ornalasqan 1 mıllıard dollardan asa somaǵa ınvestısııa tartty. Búginde BAÁ-de bolyp jatqan tehnologııalyq bým bizdiń talantty mamandarymyz ben qyzyqty startaptarymyz úshin jańa perspektıvalar ashady», dedi T.Máýleshov.