Balqash qalasynda qasqyr soǵyp alǵan 85 jastaǵy áje turady. Jarty ǵasyrǵa jýyq ýaqyt attan túspeı, aqtyly qoı órgizgen Sákúl Saqbaevanyń bul batyrlyǵyn kózkórgender áli kúnge deıin ańyz etip aıtady.
Túz taǵysyn soǵyp almaq túgili, atynyń ózi úreı ushyrady. Ras, qasqyrǵa júreginiń túgi barlar ǵana qarsy tura alady. Jasynan er minezdi bolyp ósken Sákúl Árinqyzy jalǵyz aǵasy Tursynǵa qolǵabys kórsetip, eńbekke erte aralasqan. Ákesiniń ǵıbratty áńgimelerimen ósken ananyń qasqyr soqqanyna da elý jyldaı ýaqyt bolypty. Sol bir oqıǵasyn bizge osylaı áńgimelep berdi.
«Sol ýaqytta Aqtoǵaı aýdany Jámshi aýlynyń qoı sharýashylyǵymen aty shyǵyp turǵan kez. 40 jasqa tolǵan shaǵym. Joldasym Muǵıyn Saqypbaev ekeýmiz Seńkibaıdyń jazyǵynda qoı baǵyp otyrdyq. 1974 jyldyń 8 qarashasy edi. Áli umytqanym joq. Ádettegideı tańǵy 7.00-de Muǵıyn qoıdy óriske aıdap áketti. Oıymda eshteńe joq, úırenshikti jumysym mal sýarýǵa shyqtym. Qudyǵymyz shamamen bir shaqyrym jerde. Iinaǵashpen sý ákele jatsam, eki qasqyr buzaýdy jáýkemdep jatyr eken. Júgirip baryp, qudyq basyndaǵy kúrekti aldym da, sońynan qýa jóneldim. Aıaǵymda kerzi etik edi. Aýyr bolǵan soń, sheship tastadym. Qarǵa da qaramaı, jalań aıaq júgirip, jetip bardym. Sol bir sátte ákemniń aıtqany esime orala ketti. «Qasqyr qandaı túliktiń bolsyn ústinen qarǵysa, tura almaı qalady. Jaryqtyqtyń sondaı tylsym qasıeti bar. Jáne qasqyrdyń osal jeri – tumsyǵy» degen sózi. Tańǵaldym, rasymen de, qasqyr álgi buzaýdyń ústinen qarǵyp ótkende buzaý ornynan turmaı qaldy. Bireýi ókirtip alqymdap jatyr. Qolymdaǵy kúrektiń qyrymen qaq tumsyǵynan urǵanda, kúrek ony baltadaı shaýyp tústi. Arlan teris qarap alyp, qar aralas topyraqty aıaǵymen boratyp jatyr. Buzaýdy, meni topyraqqa kómip, ústi-ústine boratýyn toqtatar túri joq. Bir kezde «Sákúl» degen daýys estildi. Muǵıyn kórip kelgen eken dep oıladym. Sóıtsem, Seıdiǵalı degen kisi balasymen kólikteri buzylyp jaıaýlap kelgen eken. Er adamdy kórgen soń, arlan qashyp ketti. «Maılansyn, maılansyn», dedi Seıdiǵalı aǵa meni qushaqtap. Sol kezde óń men tústiń ortasynda turǵandaı boldym», deıdi batyr ana.
Qaısar minezdi ana álgi qasqyr tartqan buzaýdy qolma-qol baýyzdap, terisin sypyryp, súıegin jiliktep, borshalap tastapty. Al qasqyrdyń terisin sypyryp alyp, Seıdiǵalı aǵasynyń qanjyǵasyna baılamaqshy bolypty. Buǵan aqsaqal «Aınalaıyn, óziń soqqan qasqyr ǵoı, ózińde qalsyn» depti. Sóıtip, Sákúl ananyń qaısarlyǵy aýyl-aýylǵa birden taraıdy. Aýyl aqsaqaly Zikirııa Kópbaev batyldyǵyna rıza bolyp, aýdanǵa habarlap, jýrnalıster shaqyryp, súıinshi surapty.
Batyr ana qasqyrdyń áıel adamnan qoryqpaıtyndyǵyna sonda kózim jetti deıdi.
«Er adam bolmasa, menen qaımyǵatyn túri joq. Jáne sol kezde Baqytgúl degen qyzyma aıaǵym aýyr edi. Qasqyr soqqan ananyń súti tartylady degendi estip ýaıymdadym. Biraq sútim qaıtqan joq. Odan keıin de qursaq kóterdim. Kenjem Álibekti 1990 jyly dúnıege ákeldim. Qasqyrdy Seıdiǵalı aǵaǵa qanjyǵańyzǵa baıladym dep bergen edim. Ol kisi óziń soqqan qasqyr ózińde qalsyn dedi. Balasy úılengeli jatqan. Bir tý qoı men bir qaryn maı salyp berdim. Qasqyrdyń terisin Zikirııa aǵataı balalardy oqýǵa áketkende qalaǵa aparyp, aqshasyna ótkizip keldi», dep jalǵady Sákúl Árinqyzy áserli áńgimesin.
Taǵdyr túrli beriledi. 1989 jyly asyl jary Muǵıyn aqsaqal dúnıe salady. Sákúl ana jetinshi balaǵa aıaǵy aýyr kezinde jesir qalady. Biraq boıyndaǵy qajyr-qaıratymen jeti balasyn eshkimnen kem qylmaı jetkizedi. Bir ózi ulyn uıaǵa, qyzyn qııaǵa qondyrady. Jeti balasynan nemere-shóbere, shópshek súıip otyr. Kezinde kórgen beınetiniń zeınetin urpaǵynyń ortasynda rızashylyqpen ótkerip otyr. Qazir áýletiniń máýeli báıteregi, aqjaýlyqty anasy.
Til kóz tasqa deıik, jasy 85-ke kelse de, qımyly shıraq. «Kezinde ketpen, kúrek ustap, eńbek etkenniń arqasy», deıdi ózi.
Qaraǵandy oblysy