Qostanaıda aýtızm dertine shaldyqqan balalarǵa arnalǵan ortalyq ashyldy. 200 balaǵa shaqtalǵan beıimdeý mekemesi «Samuryq-Qazyna» AQ kompanııalar tobynyń biryńǵaı qaıyrymdylyq operatorynyń qarjylaı qoldaýymen iske qosylyp otyr.
Jańa ortalyqtyń ashylý rásimine oblys ákimi Qumar Aqsaqalov pen «Samuryq-Qazyna» AQ Korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov qatysty.
Munda bir jarym jastan on segiz jasqa deıingi balalardyń ata-analaryna da kómek kórsetiledi. Túrli terapııa kabıneti, sondaı-aq áleýmettik-turmystyq baǵdarlaý, psıholog jáne defektolog kabınetteri jumys isteıdi.
«Kóktemniń alǵashqy merekesi Alǵys kúni qarsańynda oblysta osy ortalyqty ashý bastamasy qoldaý tapty. Qala ortalyǵynda jeke turǵan ǵımarat tańdaldy, onyń aýdany 2 355 sharshy metrdi quraıdy. Bul – respýblıkadaǵy eń úlken ortalyqtardyń biri. Qaıta qurýdy júrgizý úshin oblystyq bıýdjetten 700 mln teńgege jýyq qarajat bólindi, shtat bilikti mamandarmen jasaqtaldy. Bul jerde 100-den asa maman jumys isteıdi. Jalpy, óńirimizde aýtızm dıagnozy anyqtalǵan 400-ge jýyq bala bolsa, sonyń 200-den astamy Qostanaı qalasynda turyp jatyr. Sol sebepti aýyldyq jerlerde de osyndaı ortalyq bólimderin ashýǵa suranys bar. Aldaǵy ýaqytta ár aýdan ortalyǵynan ashamyz degen josparymyz bar», dedi ákim.
Ǵıbrat Aýǵanovtyń aıtýynsha, atalǵan mekeme balalardyń ortaǵa beıimdelýine, ózderiniń erekshe qabiletteri men talanttaryn damytýǵa, bilikti kómek alýǵa múmkindik beredi. Ortalyqta balalarǵa ǵana emes ata-analarǵa da balalardy damytý men tárbıeleýdiń ártúrli máselesi boıynsha qyzmetter kórsetiletinin atap ótken jón.
Qazirdiń ózinde ortalyqqa 50 bala tirkelip, arnaıy áleýmettik qyzmetter ala bastady. Jańa ortalyqta oqytý baǵdarlamalary, ártúrli terapııa jáne ońaltý ádisi bar.
Buǵan deıin qordyń qoldaýymen Rýdnyıda neıro-ortopedııalyq buzylystary bar balalarǵa arnalǵan ońaltý ortalyǵy ashylǵan. Oǵan 600 erekshe bala barady.
Qostanaı oblysy