Almatydaǵy Jastar ortalyǵynda elimizdiń ár aımaǵynan kelgen Jastar saıasaty basqarmalarynyń jetekshileri bas qosyp, jańa býynnyń ómir tynysyndaǵy ózekti máselelerdi talqylady.
Is-sharaǵa Almaty qalasy ákiminiń orynbasary Arman Qyryqbaev, Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Qambarov, Jastar saıasaty basqarmalarynyń basshylary, Jastar resýrstyq ortalyqtarynyń jetekshileri jáne megapolıstiń belsendi jastary qatysty.
Almaty ákiminiń orynbasary ákimdiktiń jastarǵa arnalǵan áleýmettik ınfraqurylym qurýdaǵy basym baǵyttary men jumys jospary týraly aıtyp berdi.
– Almaty turǵyndarynyń shamamen úshten biri nemese 682 myńy 14 pen 35 jas aralyǵyndaǵy jastar. Bul óz kezeginde bizden jastardy qalamyzdyń damýy úshin atqarylyp jatqan jumystarǵa belsendi tartýdy, olardyń jaıly ómir súrýi, jumys isteýi, bos ýaqytyn tıimdi ótkizýi úshin qolaıly jaǵdaı jasaýdy talap etedi. Osy oraıda qalamyzdyń barlyq aýdanynda NEET jastardy qoldaý úshin 8 komıýnıtı ortalyq ashtyq, – dedi Arman Qyryqbaev.
El jastarynyń basym bóligi shoǵyrlanǵan megapolıste jastardy qoldaýǵa arnalǵan aýqymdy jobalar az emes. Bıyldan bastap qalanyń ár aýdanynda osy sanattaǵy azamattardy qoldaýǵa arnalǵan komıýnıtı ortalyqtar óz jumysyn bastaǵan bolatyn. Almaty qalasy Jastar saıasaty basqarmasynyń basshysy Qaıyrjan Mendiǵalıev aımaqtardan kelgen qonaqtarǵa el aýmaǵynda alǵash qanat qaqqan jobanyń jumysy týraly baıandady.
– Árbir komıýnıtı ortalyq kreatıvti qoǵamdyq keńistikti quraıdy. Munda jastardy qoldaý úshin qajettiniń bári bir jerde jınaqtalǵan. Bul – ártúrli memlekettik baǵdarlama boıynsha keńes berý, psıhologııalyq jáne zańgerlik kómek, NEET jastaryn qysqamerzimdi kýrstar arqyly ózekti mamandyqtarǵa oqytý jáne jumysqa ornalastyrý. Jastar úshin aqysyz negizde bilim berý kýrsy men biliktilikti arttyrý kýrstaryn ótkizýge, jastar baǵdarlamasyn qazirgi zamanǵa beıimdeýge ár kez daıynbyz, – dep atap ótti Q.Mendiǵalıev.
Joǵaryda aıtyp ótkendeı, Almatyny damytý baǵdarlamasy aıasynda 2025 jylǵa deıin qala aýmaǵynda 16 jastar komıýnıtı ortalyǵyn iske qosý josparlanǵan. Jastarǵa qoldaý kórsetetin mundaı alańdar qurý – álemdik tájirıbede jemisin bergen joba. Komıýnıtı ortalyqtar eńbek naryǵy úshin suranysqa ıe mamandardy daıarlaýǵa jáne jastardy megapolıstiń qoǵamdyq bastamalaryna tartýǵa múmkindik bermek.
«Jastarǵa qoldaý kórsetetin, qajettiniń barlyǵyn bir jerde jınaqtaǵan komıýnıtı ortalyqtardy kórip qýanyp otyrmyn. Munda jastardy qoldaýǵa barlyq jaǵdaı jasalyp, eń bastysy, qyzmet túrlerin tegin alýǵa bolatyny qýantty. Mundaı formattaǵy ortalyqtar tek Almatyda emes, elimizdiń barlyq qalasynda bolýy qajet», deıdi Jastar jáne otbasy isteri komıtetiniń tóraǵasy Qaırat Qambarov.
Jetekshi mamandar tehnokratııa dáýiriniń jastaryn qandaı máseleler alańdatatynyn, olardy qoǵamdyq qundylyqtarǵa baýlýdyń mán-mańyzyn, túrli teris baǵytqa boı aldyrǵandardy jańsaq oıdyń shyrmaýynan shyǵarýdyń tetikterin talqylady. О́zge óńirlerden kelgen mamandar bul baǵytta Almatynyń tájirıbesine júginýdiń artyqshylyǵy mol dep esepteıdi. Sebebi Almatynyń ár aýdanynan ashylǵan ortalyqtar jastardyń qoǵamnan óz ornyn tabýyna oń yqpalyn tıgizedi.
ALMATY