Qazaqstan Respýblıkasy Mádenıet jáne aqparat mınıstrliginiń qoldaýymen Jambyl atyndaǵy Qazaq memlekettik akademııalyq fılarmonııasynda gıtarısterdiń jańa toby quryldy.
Kvıntettiń kórkemdik jetekshisi – ataqty gıtarıst, kompozıtor, halyqaralyq baıqaýlardyń laýreaty Baýyrjan Jylqybaev. Onyń aıtýynsha, gıtarıster kvıntetin uıymdastyrý kópten beri kóńilde júrgen jospar bolǵan. Fılarmonııa basshylyǵynyń usynysynan soń, oılanbaı iske kirisken kórinedi.
Kvıntet músheleriniń qaı-qaısy bolsyn – qazaq ónerinde ózindik orny, óz soqpaǵy bar jandar. Aqbar Qıarystan – daryndy gıtarıst, áıgili MýzART tobynda jumys istegen kásibı maman. Asan Narbota men Záýre Narbota Temirbek Júrgenov atyndaǵy óner akademııasyn bitirgen. Bir qyzyǵy, kvıntettiń ár múshesi bir-birimen burynnan rýhanı, shyǵarmashylyq baılanysta. Mysaly, Baýyrjan Jylqybaev pen belgili ustaz Gennadıı Kım akademııada Asan men Záýrege ustazdyq etken. Toptyń taǵy bir tamasha mýzykanty – Gnesınder atyndaǵy Reseı mýzyka akademııasynyń túlegi, tanymal reseılik ánshi Andreı Gýbınmen 10 jyl birge jumys istegen gıtarıst Ulanbek Ahmetov.
Toptyń negizgi repertýary – flamenko rýmba stılinde. Kvıntet qorjynynda otandyq kompozıtorlardyń shyǵarmasymen qatar, álemdik gıtarıster – «Romantıkalyq ıspan gıtarasynyń patshasy» atanǵan Djessı Kýk pen «Júz uly gıtarıstiń» biri sanalatyn Djekı Kıngtiń týyndylary bar.
Buǵan qosa kvıntet qazaq kúılerin de gıtaraǵa laıyqtap, jańa tynys berip, tyńdarman qaýymǵa usynyp otyr. Qazirdiń ózinde top jetekshisi Baýyrjan Jylqybaev – gıtaraǵa arnalǵan alty kúıdiń avtory.
Kvıntettiń tusaýkeser konserti 20 naýryz kúni Jambyl atyndaǵy Qazaq memlekettik akademııalyq fılarmonııasynyń úlken zalynda ótedi.
Aısulý SEZHAN,
Abaı atyndaǵy QazUPÝ stýdenti
Almaty