Almatyda Dostyq úıinde Ulttyq ǵylym akademııasynyń uıymdastyrýymen elimizdiń ǵylym salasyn jańǵyrtý máselerine arnalǵan dóńgelek ústel ótti, dep habarlaıdy Egemen.kz.
Is-sharaǵa salalyq jáne qoǵamdyq akademııalar basshylary qatysty.
Alqaly jıyndy júrgizgen Ulttyq ǵylym akademııasynyń prezıdenti A. Kúrishbaev Memleket basshysynyń Ulttyq ǵylym akademııasyn reformalap, onyń búgingi zaman talabyna saı mıssııasy men mindetterin qaıta aıqyndaýdy qoldap otyrǵanyna basa nazar aýdardy.
«Memleket basshysy Q. Toqaev ǵylym salasyn damytýǵa asa zor kóńil bólip otyr. Sonyń nátıjesinde jańadan Ǵylym jáne joǵary bilim mınıstrligi, Prezıdent janyndaǵy Ǵylym men tehnologııalar keńesi quryldy. Ulttyq ǵylym akademııasyna jańa mártebe berilip, ǵylym salasyn qarjylandyrý 3 esege artty. Ǵylym salasyna kórsetilgen qoldaý ǵalymdar qaýymdastyǵyna úlken mindetter júkteıdi jáne ony oıdaǵydaı júzege asyrý úshin «Birlik bar jerde tirlik bar» nemese «Birlese kótergen júk jeńil» degen qaǵıdalardy basshylyqqa ala otyryp, bir jaǵadan bas, bir jeńnen qol shyǵaryp eńbek etýge tıistimiz. Osy oraıda Ulttyq ǵylym akademııasyn táýelsiz, ákimshilik emes, mınıstrlikterdiń mindetterin qaıtalamaıtyn, Úkimetke saraptamalyq tujyrymdar beretin jáne forsaıttyq izdenister jáne de tehnologııalyq boljamdar negizinde otandyq ǵylymnyń strategııalyq damý baǵyttaryn anyqtaıtyn organǵa aınaldyrý mindeti tur. Sondaı-aq ǵylymı izdenisterdiń álemdegi aldyńǵy qatarly ǵylymı ortalyqtary men mektepteriniń tájirıbesine negizdelgen jańa formatyn usynatyn bolamyz. Ulttyq ǵylym Akademııasy elimizdiń ǵylymynyń ıntegrasııalanǵan júıesin quryp, memleketimizdiń ǵylym áleýetiniń qoryn quratyn bolady. Sonymen qatar ǵylym salasyna jas talanttardy tartýǵa meılinshe yqpal etedi», dedi óz sózinde A. Kúrishbaev.
Jıyn barysynda Qazaqstan ǵalymdar odaǵynyń prezıdenti Orazáli Sábden, «Qazaqstan Ekonomıkalyq ǵalymdar akademııasynyń» prezıdenti Rahman Alshanov, «Qazaqstan ulttyq jaratylystaný ǵalymdar akademııasynyń» birinshi vıse-prezıdenti Vladımır Shkolnık, Aýylsharýashylyǵy ǵylymdary akademııasynyń prezıdenti Tilektes Espolov, «Halyqaralyq reprýdýktologııa akademııasynyń» prezıdenti Vıacheslav Lokshın, taǵy da basqa salalyq akademııalardyń ókilderi, ǵalymdar Ulttyq ǵylym akademııasyn reformalaý qadamdaryna qoldaý bildire otyryp, ǵylym salasyn damytý men zaman talabyna saı joǵary deńgeıge kóterýge baǵyttalǵan naqty usynystaryn bólisti.
Osy oraıda ǵylymdy damytýdyń ózekti máselelerin kótergen ǵalymdar «Ǵylym jáne tehnologııalyq saıasat týraly» zań jobasyn jetildirý, ǵylymı jobalardy, ónertabystardy óndiriske engizý, ǵalymdardyń mártebesin kóterý men qarjylandyrýǵa qatysty tushymdy oılaryn ortaǵa saldy. Ǵylymda sońǵy otyz jyl ishinde qordalanǵan kóptegen máseleni akademııa basshylary kótere otyryp, osy iste UǴA tarapynan mańyzdy ári mazmundy qadamdardyń júzege asatynyna senim bildirdi. Túıtkildi máseleler qatarynda ınfrqurylym, zerthanalyq múmkindikter, bólingen qarjyny tıimdi ıgerýge qatysty jaıttar basshylyqqa alyndy.
Jıyn sońynda Ulttyq ǵylym akademııasy men salalyq jáne qoǵamdyq akademııalar ózara túsinistik jáne yntymastyq memorandýmyna qol qoıdy.
ALMATY