ShQO-da kisi qolynan qaza tapqan marqumnyń týystary kúdiktiniń sytylyp ketýinen qaýiptenedi. Bul týraly Egemen.kz tilshisi jazady.
Nurtas Soltanuly Facebook jelisinde áýletiniń úlken qaıǵyǵa dýshar bolǵanyn jazǵan.
«Mende bar aqparat boıynsha, 2024 jyldyń 2 naýryzynda ShQO, Marqakól aýdany, Qaljyr aýylynda meniń týǵan aǵam Kósherov Jaras Soltanulyn osy aýyl túrǵyny Nurmuhanov Baýyrjan Maqsatuly pyshaqtap óltirip ketti. Bul týraly marqum aǵam meniń apaıym Jadyraǵa tiri kezinde habarlasyp úlgerip, telefonmen kómek suraǵan. «Meni Nurmuhanov Baýyrjan pyshaqtap ketti, qor boldym-aý» dep aıtqan.
Sodan beri 4 táýlik ótse de, kúdiktini qylmystyq is boıynsha qamaýǵa sanksııa berilgen joq, tek polısııaǵa baǵynbaǵany úshin ǵana ákimshilik ispen qamady», delingen onyń jazbasynda.
Derekke qaraǵanda, kúdikti buǵan deıin de 2 adamdy óltirip, alǵashynda shartty jaza alsa, kelesi qylmysy úshin 3,5 jylǵa ǵana sottalǵan. Sebebi, onyń týystary óte aýqatty jáne yqpaldy adamdar kórinedi.
«Mysaly, kúdikti Nurmuhanov Baýyrjan Maqsatulynyń nemere aǵasy Nurmuhanov Baqyt Maratuly - QR Konstıtýsııalyq Soty tóraǵasynyń orynbasary. Qolymyzda bar málimet boıynsha, qazir isti tergep jatqan tergeýshiler onyń aýyldastary, jergilikti ROVD bastyǵy Jandos Kýshkınchınov, Marqakól aýdandyq prokýrorynyń orynbasary Erjan Ázimbaev. Sondyqtan olar isti, meniń aǵam kúdiktige shabýyl jasaý kezinde ózin-ózi pyshaqtap óldi degenge ákele jatyr. Tipti, erteń meniń aǵama neshe túrli jala jaýyp, ózin kináli etip shyǵarýy múmkin! Buǵan deıin 2 adam óltirgen Nurmuhanov Baýyrjan taǵy da qutylyp ketýi ǵajap emes. Bul - qoǵamǵa qaýipti adam. Búgin meni qan qaqsatsa, erteń Sizdi zar jylatýy múmkin!», deıdi marqumnyń týysy.
Ol jergilikti ShQO Polısııa departamentiniń bastyǵy E.Omarbekovke de osy máseleni aıtý úshin barǵanymen, ol qabyldamaǵan.
Oqıǵaǵa qatysty Prezıdenttiń ishki saıasat máseleleri jáne kommýnıkasııalar jónindegi kómekshisi Rýslan Jeldibaı pikir bildirgen. Ol atalǵan qylmystyq is qatań baqylaýda bolatynyn aıtty.