Jarkenttik qyz-kelinshekter kásipke erekshe den qoıyp keledi. Qazir sol óńirde júzdegen áıel kásipker bar. Kóbi arýǵa tán ıgilikti istiń tutqasyn ustaǵan. Máselen, «Sanam» kýlınarlyq sehynyń qojaıyny Sanam Sadyqova óz aýdanyn ǵana emes, kórshiles Uıǵyr aýdanynyń turǵyndaryn da táttimen qamtamasyz etip keledi.
Biraz jyldan beri Jarkent qalasynyń brendine aınalǵan «Sanam» tátti taǵamdary jetisýlyqtardyń da aýzynda. Búginde atalǵan seh Panfılov, Uıǵyr aýdandaryndaǵy otyzǵa jýyq kafeterıı men azyq-túlik dúkeni arqyly ózderi pisirip daıyndaǵan kýlınarlyq táttilerin saýdalap keledi. Tutynýshylardy ásem bezendirilgen tort pen tátti túrleriniń qoljetimdi baǵasy qýantady. Dastarqan kórkin kirgizetin bal tatyǵan toqashtar áralýandyǵymen kóz arbaıdy.
«Mereke jaqyndaǵan saıyn táttilerge suranys kóp bolady. Onyń ústine bul taǵamdar ýaqyt tańdamaıdy, halyq kúndelikti tutynǵandyqtan ótimdi. Qolda turmaıdy desek te bolady. Biz óte uqyptylyqpen tutynýshynyń talabyn eskere otyryp daıyndaımyz. Sondyqtan búginge deıin eshkimnen jaǵymsyz pikir estip kórgen joqpyz. Saýdamyz sátimen júrip jatyr. Tutynýshylardy kún saıyn pisirilgen dámdi taǵamdarymyzben qýantyp jatyrmyz», deıdi «Sanam» kýlınarlyq sehynyń qojaıyny S.Sadyqova.
Kásipker kelinshektiń negizgi mamandyǵy – astyq saqtaý men qaıta óńdeý tehnologi. Jeke kásipkerlikpen shuǵyldanardan buryn Kóktal júgeri zaýytynda sarapshy bolyp eńbek etken. 1986 jyly Jarkent qalasyndaǵy qurylys materıaldary zaýytyna sapa ınjeneri qyzmetine aýysady. Onyń kýlınarlyq qyzmetti tańdaýyna toqsanynshy jyldardaǵy iri kásiporyndar men zaýyttardyń jappaı jabyla bastaýy sebep bolǵan. О́z mamandyǵy boıynsha jumys tappaı, elmen birge qytaı taýarlaryn saýdalap júrip, tórt kúnge Úrimjige barady. Osy qaladaǵy arnaıy tehnologııamen táttiler pisiretin «Armanı» óndiris kombınatynyń jumysymen tanysady. Dámi bal tatyǵan táttiniń túrleri ony tamsandyryp qana qoımaı, óndiriske degen qyzyǵýshylyǵyn arttyrady. Sol sátte ol jerlesterine osyndaı kýlınarlyq sheberlikpen pisirilgen tátti taǵamdar usynýdy maqsat etken. 2003 jyly «Sanam» JK bıznesin bastap, otbasylyq kásiporyn ashqan. Joldasy Qurbanjan Taıamov ta kelinsheginiń bıznesin qoldap, kásipkerliktiń órken jaıýyna kómegin tıgizgen. Qazir ujymda 47 adam qyzmet isteıdi. Ýaqyt ótken saıyn kásiporynda óndiriletin ónim túri kóbeıip, óndiristik qýat artyp keledi. 2017 jyly Sanam Sadyqova respýblıkalyq «Aq dastarqan» báıgesine qatysyp, 3-oryndy jeńip alsa, 2019 jylǵy naýryzda «Beıbitshilik álemi» halyqaralyq shyǵarmashylyq birlestiginiń «Úzdik kásipker» medalimen marapattalǵan.
Otbasylyq bıznesti órkendetken kásipker ana óńirdegi qaıyrymdylyq sharalarynan tys qalmaıdy. Sońǵy birneshe jyldan beri 3 mekteptegi 100 oqýshyny tegin ystyq tamaqpen qamtamasyz etedi. Budan basqa, Balalardy qorǵaý kúni, Jańa jyl merekesinde az qamtylǵan otbasylar men múgedek balalarǵa ózderiniń tátti taǵamdaryn usynady. Jeruıyq aýylyndaǵy orta mektepke qurylys materıaldaryn, basqa da qajet zattardy alýǵa qarjylaı kómek kórsetedi.
Jetisý oblysy