Senatta elimizdegi máslıhattardyń 30 jyldyǵyna arnalǵan halyqaralyq konferensııaǵa daıyndyq barysy talqylandy. Osyǵan oraı ótken jıynda Palata spıkeri Máýlen Áshimbaev Memleket basshysynyń tapsyrmasymen uıymdastyrylyp jatqan forým senatorlardyń máslıhat depýtattarymen ózara is-qımylyn odan ári arttyrýdy, jergilikti ókildi organdardyń qyzmetine qatysty mańyzdy máselelerdi sheshýdi jáne óńirlerdi damytýǵa yqpal etýdi kózdeıtinin atap ótti.
О́ńirlerdi damytý jáne memlekettiń óńirlik saıasatyn tıimdi iske asyrý – Senat jumysyndaǵy negizgi baǵyttardyń biri. О́z sózinde Máýlen Áshimbaev Parlament keıingi jyldarda óńirlerdegi problemalardy sheshýge arnalǵan ondaǵan zań qabyldaǵanyn atap ótti.
Qazirgi tańda elimizde máslıhattardyń qoǵamdyq-saıası mańyzy arta tústi. Osyǵan baılanysty Parlament Senatynyń uıytqy bolýymen elimizdegi máslıhattar ınstıtýtynyń 30 jyldyǵyna oraı 2024 jylǵy 18–19 sáýir kúnderi halyqaralyq konferensııa ótkizý josparlanyp otyr.
Aıta keteıik, 5 naýryzda Memleket basshysy Qasym-Jomart Toqaev Senat tóraǵasy Máýlen Áshimbaevty qabyldady. Kezdesýde Palata spıkeri reformalardy zańnamalyq turǵydan qamtamasyz etý jumystarynyń ótken aılardaǵy qorytyndysy jáne aldaǵy kezeńge arnalǵan jospary jóninde baıandady. Qabyldaý kezinde berilgen tapsyrmalardyń biri – Parlamenttiń zań shyǵarý qyzmetine jergilikti ókildi organdardyń depýtattaryn keńinen jumyldyrý.
«Prezıdent Qasym-Jomart Toqaev elimizde júrgizilip jatqan reformalardy zańnamalyq turǵydan qamtamasyz etýdiń erekshe rólin jáne Palatanyń óńirlerdi damytýǵa tıgizip kele jatqan zor yqpalyn atap ótti. Konferensııa alańynda Memleket basshysynyń bastamasymen qolǵa alynǵan saıası jáne ekonomıkalyq reformalardy iske asyrý kezindegi máslıhattardyń róli jan-jaqty talqylanady. Qýatty óńirler áleýmettik-ekonomıkalyq ál-aýqattyń negizi jáne eldiń draıveri ekeni anyq. Sondyqtan óńirlerdiń teńgerimdi damýyna jáne máslıhattardyń nátıjeli jumys isteýine yqpal etý jolynda kúsh jumyldyrýdyń mańyzy zor», dedi Máýlen Áshimbaev.
Halyqaralyq konferensııaǵa Parlament depýtattarymen birge barlyq deńgeıdegi máslıhattardyń tóraǵalary, sondaı-aq qazaqstandyq jáne sheteldik sarapshylar qatysady dep josparlanyp otyr.