Parlament Senatynyń tóraǵasy, Qazaqstan bochcha federasııasynyń prezıdenti Máýlen Áshimbaev atalǵan paralımpıadalyq sport túrinen dástúrli týrnırdiń jabylý rásimine qatysyp, jeńimpazdardy marapattady. Jarys bochchadan alǵashqy qazaqstandyq jattyqtyrýshy Sultanbek Orynbasarovty eske alýǵa arnaldy.
Máýlen Áshimbaev saıysqa qatysýshylardy týrnırdiń joǵary deńgeıde ótýimen quttyqtaı kelip, Sultanbek Orynbasarovtyń Qazaqstanda bochcha sportynyń qalyptasyp, damýyna zor eńbek sińirgenin atap ótti. Kóshbasshylyq, tabandylyq, sportqa adaldyq sııaqty qasıetterimen tanylǵan ol kópke úlgi kórsetip, júzdegen balanyń jeńiske degen qushtarlyǵyn oıatty.
Federasııa prezıdenti ótken úsh jyldyń ishinde elimizde atalǵan sportqa degen qyzyǵýshylardyń qatary aıtarlyqtaı artqanyna nazar aýdardy. Alǵash ret, ıaǵnı 2021 jyly saıysqa elimizdiń alty óńirinen kelgen 30 sportshy qatysqan. Al bul joly 10 óńirdiń namysyn qorǵaǵan 70 sportshy baq synady. Máýlen Áshimbaevtyń aıtýynsha, mundaı úrdis ınklıýzıvti orta qalyptastyrý baǵytyndaǵy jumystyń mańyzdylyǵyn jáne múgedektigi bar adamdar úshin arnaıy qaýymdastyqtyń qanshalyqty qajet ekenin kórsetedi.
Sondaı-aq Senat spıkeri Memleket basshysy Qasym-Jomart Toqaevtyń ınklıýzıvti qoǵam qurý máselesine únemi basa mán berip kele jatqanyn aıtty. Osyǵan baılanysty elde kedergisiz orta qalyptastyrý úshin tıisti jumystar atqarylyp jatyr. Berik ınstıtýsıonaldyq negiz qalyptasyp, elimizdiń iri qalalarynda bochcha sportynyń úıirme-fılıaldary ashylyp jatyr.
«Júıeli jattyǵýlar parasportshyny odan ári shyńdap, olardyń tózimdiligin arttyryp, namysyn qaıraıdy. Ár adam óziniń boıyndaǵy osyndaı qasıetterdi kúndelikti jetildirip, damytyp otyrýy qajet. Prezıdentimiz Qasym-Jomart Kemeluly Toqaev erekshe qajettiligi bar azamattarǵa qoldaý kórsetý jáne kedergisiz orta qalyptastyrý máselelerine árdaıym basa mán berip keledi. Bul – bizdiń memleketimiz ben qoǵamnyń aldynda turǵan mańyzdy mindetterdiń biri. Sondaı-aq osy másele Parlamenttiń de aıryqsha nazarynda», dedi Máýlen Áshimbaev.
Sonymen qatar Palata tóraǵasy Qazaqstan bochcha federasııasynyń aldaǵy jumys josparyna toqtaldy. Bul rette Ulttyq quramanyń kásibı deńgeıin arttyrý, sol arqyly parasportshylardy qoldap, yntalandyrý, elimizde atalǵan saıys túrin odan ári dáripteý jáne «Barshaǵa arnalǵan bochcha» tujyrymdamasyn iske asyrý osy baǵyttaǵy mańyzdy mindetter retinde belgilengenin atap ótken jón.
«Biz erekshe sportshylardy daıarlaý jáne jattyqtyrýshylar quramyn kúsheıtý baǵytyndaǵy jumysty jalǵastyra beremiz. Bul iste óńirlerge basymdyq beriletinin atap ótken jón. Biz elimizde bochchany damytýdyń negizgi eki baǵytyn belgilep aldyq. Birinshiden, áleýeti joǵary parasportshylardy qoldaýdyń jáne olardyń iri halyqaralyq jarystarǵa qatysýyn qamtamasyz etýdiń mańyzy zor. Ekinshi perspektıvalyq baǵyt – «Barshaǵa arnalǵan bochcha» tujyrymdamasy. Múgedektigi bar azamattardyń ortaǵa beıimdelýine yqpal etetin mundaı qadam sporttaǵy ınklıýzıvti jáne ıntegrasııalanǵan tásildiń jarqyn kórinisi ekeni anyq. Federasııanyń osy eki baǵyt boıynsha atqaratyn jumysy bochchany serik etken azamattardyń múddesin iske asyrýa yqpal etedi dep senemiz», degen Máýlen Áshimbaev jarystyń joǵary deńgeıde ótkizilgenine jáne oǵan qatysýshylardyń sheberligine nazar aýdardy.
Qazaqstan bochcha federasııasy mamandarynyń aıtýynsha, Federasııa jeke jarystarmen qatar, alǵash ret komandalyq jáne juptyq saıystar ótkizip otyr. Bul týrnır elimizdiń úzdik bochchashylaryn anyqtaý, ınklıýzıvti qoǵam qurý jolynda atqarylyp jatqan jumystarǵa jurtshylyqtyń nazaryn aýdarý jáne múgedektigi bar azamattardyń teń quqyǵy men múmkindigin qamtamasyz etýdi kózdeıdi.
Aıta keteıik, bochchadan ashyq respýblıkalyq týrnır 4–6 naýryz kúnderi elordadaǵy «Aspan» sport kesheninde ótti. Jarysqa elimizdiń 10 óńirinen, naqty aıtqanda, Astana, Almaty, Shymkent qalalary men Qaraǵandy, Atyraý, Pavlodar, Mańǵystaý, Jambyl, Jetisý jáne Abaı oblystarynan kelgen 70 sportshy qatysty.