Kógildir Kókshege kóktem lebi jetti. Záý bıikten sebezgileı quıylǵan shýaqpen merekege oraı kókirekterde búr jarǵan aıaly sezim astasyp, tórtkúl tóńirektiń bári jadyraı jaınap ketkendeı.
Oblys ortalyǵyndaǵy Dostyq úıinde ótkizilgen «Shýaq shashqan mereke» atty konserttik baǵdarlama óziniń mán-mańyzymen kórermen kóńilin baýrap, san sanaǵa oı salǵandaı. Qoǵamdyq kelisim mekemesiniń basshysy Ermek Nuǵyman názik jandylardyń búgingi qoǵamdaǵy ózindik orny týraly tereńnen tolǵaı aıtyp berdi. Ár otbasynyń altyn dińgegine aınalyp otyrǵan asyl analardyń tól merekesi kóńilderdi kóktem eter án-jyrsyz ótkizilmeıtindigi belgili. Bul kúni qyz-kelinshekterge alaýlaǵan qushaq-qushaq gúl syılanyp, júrek jadyratar quttyqtaý sózder aıtyldy. Eń bastysy, merekelik sharaǵa jınalǵandar ondaǵan ulttar men ulystardyń ókilderi edi. Olardyń bir-birine degen aqjarma sózinen-aq sútteı uıyǵan tatýlyq pen bekem birlikti aıqyn ańǵarýǵa bolady. Oblystyq slavıan, orys jáne kazak uıymdary qaýymdastyǵynyń tóraǵasy Gennadıı Osınenkonyń da quttyqtaý sózi kópke oı salǵandaı. Ol óz sózinde uly ónerdiń ulttar men ulystar arasyndaǵy dostyqtyń altyn arqaýyn bekite túsetin kúsh ekendigin aıtyp berdi.
Etnomádenı ortalyqtardyń ónerpazdary ár tilde ásem ánderin oryndap, myń buralǵan bılerin jınalǵan qaýymnyń nazaryna usyndy. Ár tilde aıtylǵanymen, mazmun-maǵynasy jarqyn dúnıeniń jarastyǵyn birge bólisip, el tarıhyn birge órisip jatýdyń ózi bir baqyt ekendigin meńzep turǵandaı. Qys boıy qabaǵy túksıip turatyn Kókshe aspany dál osy kúni jadyrap, baýyryndaǵy taǵdyr tabystyrǵan támam jurttyń qýanyshyna óz shattyǵyn eselep, kóńil tostaǵanyn shúpildete toltyryp turǵandaı edi.
Tatýlyqqa, bir-birin uǵa bilgenge ne jetsin, shirkin!
Kókshetaý