Ol – mýzeı isine jan-júregimen berilgen maman. Ekskýrsııa kezinde Qazaqstandy áıel beınesi arqyly tanytýǵa tyrysady. Sebebi bizdiń keıipker ulttyń minezi, tarıhy jáne rýhanııaty názik jandylardyń janarynda anyq kórinedi dep sanaıdy. Bir kezderi ol AQSh-tyń birinshi hanymy jáne memleket qaıratkeri Hılları Klıntondy, Ekinshi dúnıejúzilik soǵysta qoldanylǵan qarýdyń avtory Mıhaıl Kalashnıkovty qazaq mádenıetimen tanystyrǵan. Ult mádenıetine ólsheýsiz qyzmet atqaryp júrgen bul qaıratker áıel – ardager ekskýrsovod, IýNESKO-nyń materıaldyq emes mádenı mura jónindegi ulttyq komıssııasynyń múshesi Baqyt Orazymbetova.
Baqyt Kamalqyzy Qazaqstan Respýblıkasy Memlekettik ortalyq mýzeıinde uzaq jyl qyzmet etti. Onda qazaq áıeline baılanysty kóptegen eksponat el nazaryna usynylǵan. «Ejelgi dáýirden beri qazaq áıeliniń moınyna kóptegen mańyzdy mindetter artylǵan. Áıtse de, turmystyq deńgeıden bastap, memlekettik dárejedegi áıel adamnyń róli aıryqsha bolǵan. Bizdiń halyq eshqashan qyz balasyn tómen túsirmegen. Qurmettep tórin bergen. Qyz-kelinshekter saıası isterge de erkin aralasa alǵan. Bul týraly qazaqtardyń ómirin zerttegen eýropa etnograftary biraz derek qaldyrǵan», – deıdi ol.
1997 jyly Almaty qalasyna Amerıkanyń birinshi hanymy Hılları Klınton qonaq bolady. Baqyt Orazymbetovanyń aıtýynsha, oǵan qazaq halqynyń qyz balasyn tárbıeleýdegi erekshelikteri qyzyqtyrǵan. «Osy jaýapty kezdesýdiń aldynda men AQSh elshiliginiń qyzmetkerlerinen birinshi hanymnyń ómirbaıanymen tanystyrýdy suradym. Kóptegen mańyzdy derektiń ishinen men Klınton hanymnyń ózin «máńgilik shákirt» dep sanaıtynyn bildim. Bul onyń jańa bilimdi qabyldaýǵa árqashan daıyn ekenin bildirdi. Bul – ekskýrsovod retinde maǵan erekshe jaýapkershilik júktedi», – deıdi maman. Ekskýrsııadan keıin kóp uzamaı mýzeı baspasózine AQSh elshiliginen hat keldi. Onda Klınton hanym Baqyt Orazymbetova bastaǵan mýzeı ujymynyń joǵary kásibıligine, qazaq mádenıeti týraly tereń áńgimeleri úshin alǵys bildirgen kórinedi.
Baqyt Kamalqyzynyń dárisin tyńdaýǵa kelgen mártebeli qonaqtardyń ishinde Reseı Federasııasynyń batyry Mıhaıl Kalashnıkov ta boldy. «Men ádette tehnıkalyq mamandyqtaǵy talantty adamdaryń meıirimdi jáne ádepti ekenin burynnan baıqaıtyn edim. Mıhaıl Tımofeevıch meniń osy baqylaýyma sáıkes keldi. Ol soǵysqa deıingi jyldary ózi ómir súrgen Almaty oblysyndaǵy Mataı aýylyna arnaıy kelipti. Aıtpaqshy, ol dál sol jerde óziniń avtomatynyń alǵashqy syzbalaryn jasaǵan bolatyn. Mýzeıge kelgende M.Kalashnıkov Qazaqstan týraly jyly estelikterin aıtty. Túrkilerdiń altyn besigi – Altaıdyń týmasy bolǵandyqtan, ol kóshpeli órkenıettiń tarıhyna óte qatty qyzyǵýshylyq tanytty», – deıdi. Aıtýynsha, ol qazaq mádenıeti men turmys zattaryna tánti bolypty. Qazaq aýylyndaǵy balalyq shaǵyn eske alyp, qazaq áıelderiniń myqtylyǵyna aıryqsha toqtalǵan.
Baqyt Orazymbetova ekskýrsııa kezinde aqparatty jalań berip qoımaıdy. Ol Abaıdyń, Muhtar Áýezovtyń sonymen qatar, álem ádebıetiniń iri ókilderi – Tolstoı, Remark, Floberdiń qanatty sózderin, ǵıbratty tálimin tiline tıek etip otyrady. Osylaısha, bilikti maman mýzeı qonaqtaryn tarıhtyń jańa keńistigine kóterip, qazaq mádenıetin asqan súıispenshilikpen tanystyrady.