Jıyrma eki jastaǵy boıjetken Vera Pletneva maqal-máteldep sóılegende sózdiń maıyn tamyzady. Eńbekshiqazaq aýdanynyń Aqjal aýylynda dúnıege kelgen orys qyzy Qurózek ortalaý mektebine 1-synypqa baryp, alǵashqy álippeni qazaq tilinde tanıdy. Alǵyr qyz aldyna aıqyn maqsat qoıyp, mektepten soń Qonaev qalasyndaǵy Qapshaǵaı kópsalalyq kolledjiniń «modeler dızaıner» mamandyǵyna oqýǵa túsedi.
Memlekettik tilde erkin sóılep, qazaqtyń salt-dástúr, ádet-ǵurpyna qurmetpen qaraıtyn Vera Vladımırqyzyn biletinder ony qazaq qyzynan kem kórmeıdi. Mektep jasynan is-sharalardyń kóshbasynan kórine bilgen Vera qaı iste de belsendiligimen tanylǵan. Halyq bılerin bılep, kórermen yqylasyna bólengen kezderi az emes. Kitapqumarlyǵy da aınalasyna kóziqaraqty dostar jııýyna yqpal etken. Qazirgi kezde qarjy, ekonomıka, psıhologııalyq kitaptardy oqyp, oıyn jetildirýmen, bilimin-biligin ushtaýmen aınalysyp keledi. Bos ýaqytynda aǵylshyn tilin ıgerýge de den qoıa bastaǵan jastyń oıy ushqyr, talaby taýdaı. Bıyl qańtar aıynan bastap Almaty oblysynyń ishki saıasat basqarmasy «Qoǵamdyq kelisim jáne damý ortalyǵy» KMM-de jumys isteıdi.
«Úıimizde týǵan tilimizde sóılessek te, kópshilik oryndarda, kóshede el-jurtpen qazaq tilinde sóılesý ádetke aınalǵan. Bul – meniń qasıetti topyraǵynda dúnıege kelip, tirshilik etip otyrǵan peıili daladaı qazaq eli men jerine qurmetim», degen Vera bala kezden Naýryz merekesin asyǵa kútetinin aıtady.
«Naýryz – meniń súıikti merekelerimniń biri. Naýryz kóje jeti túrli dánniń qospasynan ázirlenetinin áli esten shyǵarǵan joqpyn. Naýryz merekesi kelgende shańyraǵymyzda mindetti túrde Naýryzkóje jasalady. Reseıde turatyn jaqyn týysqanymyz bar. Solar osydan jeti jyl buryn bizge naýryz merekesi qarsańynda qonaqqa kelgen bolatyn. Sol kezde anam naýryzkóje jasaǵan edi, olarǵa naýryz kóje qatty unady, tipti anamnan ertesine kóbirek jasap berýdi ótindi», dep aǵynan jarylǵan Vera aýyldastary men ustazdaryna aıryqsha lebizin bildirdi.
– Qazaqtyń tilin, salt-dástúrin úırenýime úles qosqandary úshin ustazdarym men janymdaǵy jaqsy adamdarǵa myń alǵys aıtamyn. Keń baıtaq elde týyp-óskenimdi maqtan etemin, qonaqjaı qasıetin qurmetteımin. «Kóppen kórgen – uly toı» demekshi, aýylda óskenimniń arqasynda kóppen ortaq til tabysa bildim. «Batamen el kógerer, jańbyrmen jer kógerer» dep beker aıtpaǵan. Bata alsam, baqytqa bólengendeı bolamyn. Adal eńbek etip, bata alyp júrgen adamnyń joly ashyq, mereıi ústem bolady. Bul meniń – basty qaǵıdam, – deıdi Vera. – Bolashaqqa jol bastap, jón silteıtin búgingi – jastar. Sondyqtan elimizdiń árbir turǵyny keleshegimizdiń jarqyn bolýyn oılap, ári qaraı da bir shańyraq astynda tatý-tátti ómir súrip, táýelsiz elimizdi nyǵaıtýǵa úles qosa berýimiz kerek.
Almaty oblysynda búginde 105 etnos ókili turady. О́ńirde 26 etnomádenı ortalyq jumys isteıdi. Sonymen qatar Almaty oblystyq Qazaqstan halqy Assambleıasy janynda ǵylymı-saraptamalyq top, aqsaqaldar alqasy, analar keńesi, medıasııa keńesi, jetekshi jýrnalıster toby, kásipkerler qaýymdastyǵy jáne «Assambleıa jastary» RQB ókildigi jumys atqarady. Árbir qurylym qoǵamdyq kelisimdi qamtamasyz etýge, Qazaqstan halqy Assambleıasynyń saıası jáne azamattyq ınstıtýt retindegi qoǵamnyń birligin, toleranttylyqty nyǵaıtýdaǵy, etnosaralyq kelisimdi saqtaýdaǵy rólin kúsheıtýge óz úlesterin qosady.
Almaty oblysy