Prezıdent janyndaǵy Ulttyq ǵylym akademııasy Qazaq ulttyq qyzdar pedagogıkalyq ýnıversıtetinde Halyqaralyq áıelder kúni merekesine arnalǵan saltanatty is-shara ótkizdi. Osy jıynda ǵylym salasynda úzdik nátıje kórsetken áıel ǵalymdar úshin «Naıla Bazanova medali» taǵaıyndalǵany týraly habarlandy.
Jıyn barysynda Ulttyq ǵylym akademııasynyń prezıdenti, akademık Aqylbek Kúrishbaev dástúrli kóktem merekesi sulýlyq pen náziktik, rýhanı danalyq kúni ekenin atap ótip, áıelderdiń saıasattaǵy, ekonomıka jáne áleýmettik salalardaǵy jetistikterine toqtaldy. Al el ǵylymyn damytýǵa qosqan áıelderdiń úlesi orasan. Búginde olar jalpy ǵalymdardyń 60 paıyzǵa jýyǵyn quraıdy.
«Halyqaralyq áıelder kúnin biz árqashan da kóktemmen birge keletin jylýlyq pen sulýlyq rámizi retinde qabyldaımyz. Halqymyzdyń «Jumaq – ananyń izinde, shýaq – ananyń kózinde» degen danalyǵyna nazar aýdarar bolsaq, búginde áıelderdiń qoǵamdaǵy alar orny erekshe. Olar januıanyń qamqorshysy ǵana emes, qoǵamnyń barlyq salasynyń damýyna orasan zor úles qosyp otyrǵan belsendi tulǵalar. Ǵylym men bilim berý salasyna qosyp júrgen úlesi qomaqty. Statıstıkalyq derekterge súıensek, jyl saıyn ǵylymı jumystarmen aınalysatyn áıelderdiń qatary kóbeıip keledi. Mysaly, 2015 jyly olardyń úles-salmaǵy 50 paıyz bolsa, búgingi tańda bul kórsetkish 54,5 paıyzǵa jetip otyr. Iаǵnı saladaǵy jetistikterdiń basym kópshiligine názik jandardyń eńbeginiń arqasynda qol jetkizip kelemiz», dedi A.Kúrishbaev.
Memleket basshysy ǵylymdy damytýǵa baılanysty ǵalymdar aldyna úlken mindetter júktep otyr. Búginde el ekonomıkasyndaǵy eńbek ónimdiligin 2 ese arttyrýdyń strategııalyq mindetin ǵylymnyń qoldaýynsyz iske asyrý múmkin emes. Bul zertteý qyzmetin uıymdastyrýdy túbegeıli qaıta qaraýǵa, eski kózqarastardan arylýǵa, ǵylymdy basqarý organdarynyń fýnksııalary men ókilettikterin naqtylaýǵa jáne ǵalymdardyń zııatkerlik áleýetin tolyq ashýǵa yntalandyratyn jańa tetikterdi iske asyrýǵa mindetteıdi. Álemdik ǵylymı ortalyqtarmen batyl ıntegrasııalanyp, olardyń oń tájirıbesin qabyldap, beıimdeý ýaqyt talabynan týyndap otyr. Osy túıtkildi máselelerdi arqaý ete otyryp, UǴA prezıdenti A.Kúrishbaev bul máselede ǵylymı qoǵamdastyqtyń áıelder bóliginiń róline basa nazar aýdarý qajettigin alǵa tartty.
«Bilim berý, kadrlar daıarlaý, bilimdi taratý jáne ǵylymı zertteýlerdiń nátıjelerin óndiriske engizý úrdisine belsendi qatysatyn áıel ǵalymdardy qoldaý, olardyń kásibı jáne mansaptyq ósýine jaǵdaı jasaý, perspektıvaly jáne kreatıvti áıelderdi basshylyq laýazymdarǵa batyl usyný jóninde qosymsha sharalar qabyldaý ýaqyt talabynan týyndap otyr. Osyny iske asyryp, ǵalym áıelderdiń mártebesin arttyrý maqsatynda Ulttyq ǵylym akademııasy Qazaqstan men Orta Azııadaǵy tuńǵysh áıel-akademık, kórnekti fızıolog, Qazaq KSR Ǵylym akademııasynyń akademıgi, bıologııa ǵylymdarynyń doktory, professor, Qazaq KSR eńbek sińirgen ǵylym qaıratkeri Naıla Bazanova medalin taǵaıyndady. Bul marapat aldaǵy ýaqytta ǵylymdaǵy áıelderdiń jetistikteri men ǵylymı salanyń damýyna qosqan úlesterin eskere otyryp beriledi», dedi Ǵylym akademııasynyń prezıdenti.
Merekelik jıynǵa óńirlerden qatysqan 70-ten astam ǵalym áıelder ǵylymdy damytýmen qatar bilim sapasyn jetildirý, óskeleń urpaqty zamanaýı bilimmen sýsyndatyp, ulttyq qundylyqtarǵa baýlý tóńireginde oı órbitti. Munymen qosa ǵalym áıelderdiń mártebesi, áleýmettik ahýaly men zertteý jumystaryna, ǵylymı jobalarǵa qatysýyna baılanysty birqatar usynys aıtyldy.
ALMATY