Aqpan aıynyń sońynda Astana qalasynda «Zerdeli» aqyl-oıdy damytý mektebiniń uıymdastyrýymen bastaýysh synyp muǵalimderine arnalǵan «Altyn tuǵyr» respýblıkalyq olımpıadasy ótti.
Bul saıysqa Batys Qazaqstan oblysynan 7 bastaýysh synyp muǵalimi qatysyp, barlyǵy jeńis tuǵyrynan kórindi. Sóıtip, oblys komandalyq esepte júlderi 3-oryndy ıelendi.
Sonyń ishinde Oral qalasy №25 orta mektebiniń bastaýysh synyp muǵalimi Nurbaqyt Jambylova, Báıterek aýdany Makarov orta mektebiniń bastaýysh synyp muǵalimi Lıýdmıla Kıchatova jáne Terekti aýdany Talpyn negizgi mektebiniń bastaýysh synyp muǵalimi Aqtolqyn Nyqmuqanova ekinshi oryn alsa, Oral qalasy Qadyr Myrza Áli atyndaǵy №47 orta mektebiniń bastaýysh synyp muǵalimi Nına Esjanova, Bórli aýdany Pýgachev mektep bóbekjaı-balabaqsha kesheniniń bastaýysh synyp muǵalimi Natalıa Moseıko, Shyńǵyrlaý aýdany L.Qylyshev atyndaǵy orta mektebiniń bastaýysh synyp muǵalimi Saǵynaı Naǵymova jáne Qaratóbe aýdany Úshaǵash negizgi orta mektebiniń bastaýysh synyp muǵalimi Janat Zeınýllına úshinshi júldege ıe boldy.
Biz elordadan jeńispen kelgen Nına Esjanovaǵa jolyǵyp, jetistigimen quttyqtadyq.
«Shynyn aıtsaq, bastaýysh synyp muǵalimderine arnalǵan oblystyq, respýblıkalyq saıystar kóp emes. Budan buryn qalalyq baıqaýlardan birinshi oryn alyp júrsem de, joǵary deńgeıdegi saıysqa joldama alyp kórmegen edim. Bul Astanaǵa birinshi barýym. «Altyn tuǵyr» respýblıkalyq olımpıadasy óte tartysty ótti. Sońynan muǵalimderge arnalǵan oqytý semınarynda olımpıadalyq esepterdi shyǵarý joldary, balalardy daıyndaý jóninde naqty aqyl-keńes aldyq. Osy eki kúndik is-shara ózim úshin óte paıdaly boldy», deıdi Nına Nurmanǵalıqyzy.
Nına Esjanova – pedagog-zertteýshi biliktilik sanatyna ıe, 17 jyl pedagogıkalyq ótili bar tájirıbeli ustaz. Jańaqala aýdany Qyzyloba aýlynda týyp-ósken Nına Nurmanǵalıqyzy 2006 jyly Mahambet О́temisuly atyndaǵy Batys Qazaqstan memlekettik ýnıversıtetin bastaýysh synyp muǵalimi mamandyǵy boıynsha bitirgen eken. Keıingi alty jyl boıyna Qadyr mektebinde qyzmet etip keledi.
Qadyr Myrza Áli atyndaǵy №47 orta mektebiniń ǵımaraty 1200 oqýshyǵa arnalǵanymen, munda qazir bilim alyp jatqan balalar sany 3 myńnan asyp ketken. Bizdiń keıipkerimiz 2 «a» synybyn oqytady, synypta 28 oqýshy bar. Al mektep boıynsha dál osy 2-synyptyń 12 parallel synyby bar eken.
«Men buryn №45 mektepte qyzmet ettim. Ol jerde ár synypta eń kóp degende 24 oqýshydan asyp kórmep edi. Árıne, synypta bala az bolǵan saıyn ony oqytý sapasy joǵary bolady. Degenmen barynsha tyrysyp, eńbek etip jatyrmyz. Bastaýysh synypta balaǵa ata-ananyń kómegi kerek. Muǵalim mektepte, ata-ana úıde eki jaqtan tize qossa, balanyń oqý úlgerimi de joǵary, nátıjeli bolady. Qudaıǵa shúkir, parallel synyptar arasynda bizdiń 2 «a» synyby aldyńǵy qatarda», deıdi Nına Nurmanǵalıqyzy.
Áńgimelese kele Nına Esjanovanyń ustazdar áýletinen ekenin estip bildik. Áý basta ájesi Uldaı Toqtarova 60-jyldardan bastap Jańaqala aýdanyndaǵy mektepterde kitaphanashy bolyp qyzmet etken eken. Al óz ákesi Nurmanǵalı Sháripqalıev matematıka páni muǵalimi bolsa, anasy Iraıda Sháripqalıeva orys tili páni muǵalimi bolyp ómir boıy shákirt oqytypty. «Olar Qyzyloba aýlynda 40 jyl ustazdyq etip, zeınet demalysyna shyqty. Aýylda turatyn kóp áýlettiń úsh býyny meniń ata-anamnyń aldynan oqýshy bolyp ótken», deıdi Nına.
«Uıada ne kórseń, ushqanda sony ilesiń» deıdi ǵoı qazaq. Muǵalimder otbasynda dúnıege kelgen tórt bala da ata-ana jolyn qýypty. Aǵasy Geırat Sháripqalıev mýzyka mektebinde muǵalim bolsa, apasy Ásel Sháripqalıeva mektepte psıholog bolyp qyzmet etken. Al inisi Tımýr Sháripqalıev ózi týyp-ósken Qyzyloba aýlynda ınformatıka pániniń muǵalimi eken.
«Ata-anam meniń matematıka fakýltetine barǵanymdy qalady. Kishkentaıymnan esepke júırik edim. Biraq ózim áýelden kishkene balalarmen jumys istegendi jaqsy kórgendikten, óz qalaýymmen bastaýysh mektep muǵalimi mamandyǵyn tańdadym», deıdi Nına.
Nına Nurmanǵalıqyzynyń ózi de búginde 4 ul tárbıelep otyrǵan kópbalaly ana eken. «Ýaqytymdy janym súıgen jumysym men otbasyma teń bólemin. Túrli usynys kóp bolsa da, qosymsha jumystardan bas tarttym. Túske deıin óz synybymdy oqytamyn, qajet bolsa, keı kúnderi balalardy qosymsha sabaqqa shaqyramyn. Qalǵan ýaqytymnyń bárin otbasyma, balalaryma arnaımyn», deıdi ulaǵatty ustaz.
...Bastaýysh synyp – bala boıyndaǵy bilimniń irgetasy qalanatyn óte mańyzdy kezeń. Shákirttiń juldyzy janyp, ilim-bilimge yqylasy ashylýy kóbine alǵashqy ustazyna baılanysty. Mektep tabaldyryǵyn attaǵan balaǵa Nına Nurmanǵalıqyzy syndy bilikti ustaz tap bolsa, ata-ananyń armany sol emes pe?
Batys Qazaqstan oblysy