Bul mereke – meıirim merekesi, áıel qaýymyna degen qurmettiń eselener shaǵy. Qarańyzshy, Sarqan aýdanynyń Lepsi aýyldyq okrýgine qarasty Kókjıde aýlynyń qazynaly qart ájesi Shápen Qydyrbekova 101-kóktemin qarsy aldy. Qaýmalaǵan urpaqtarynyń ortasynda ǵumyr keship otyrǵan ájeı – búginde eń baqytty jannyń biri.
Shápen ájeı osy jasyna deıin nebir qıyndyqty da, qýanyshty kúnderdi de basynan ótkizdi. Ol 1923 jyly Sarqan aýdany Qarabóget aýlynda dúnıe esigin ashty. 1940 jyly Bórlitóbe aýdanyndaǵy Erikti ujymsharynda eńbek jolyn bastap, sodan zeınetke shyqqansha bel jazbaı eńbek etken. Ekinshi dúnıejúzilik soǵystyń aýyrtpalyǵyn qara nardaı kótergen tyl eńbekkerleriniń sapynda bolyp, qıyndyqqa qaıyspaı kóterip, beıbit kúnniń shapaǵatyn kórgenin áńgimesine arqaý etetin áz ananyń keıingilerge aıtary kóp.
Shápen apa 1947 jyly Ánýarbek Qydyrbekovpen kóńili jarasyp, turmys qurady. Bas qosqan eki jas Erikti ujymsharynda zeınetke shyqqansha mal baqty. Abyroısyz bolǵan joq, eńbekteri elenip, zor qurmetke bólendi. Shápen ájeı on balany dúnıege ákelip, keýdesine «Altyn alqa» belgisin de taqty.
«О́mirlik qosaǵym Ánýarbek 85 jas jasap, ómirden ozdy. On balamnan, atap aıtqanda 7 qyz, 3 uldan órbigen urpaqtarym alys-jaqynda júrse de, únemi hal-jaǵdaıymdy bilip turady. Nemere, jıen, shóberelerim kóńilimdi tabýǵa tyrysady. Budan artyq ata-anaǵa marapat kerek emes. Bizdiń kórgen qıynshylyǵymyzdy keıingi urpaq kórmesin. Elimiz tynysh, urpaǵymyz sanaly bolsyn», dep analyq aq batasyn berdi.
Shápen ájeı búginde ómirden óz ornyn tapqan on balasynan 29 nemere, 68 shóbere kórip otyr.
Jetisý oblysy