Keshegi kúngi jer silkinisi kezinde aq jeleńdi abzal jandardyń antyna adaldyǵy men óz isine beriktigi qyzý talqylanyp, operasııa ústelindegi jumystaryn esh alańsyz sátti aıaqtap shyqqandaryna jurt alǵysyn jaýdyrdy.
Sonyń biri Qonaev qalalyq kópsalaly aýrýhanasynyń akýsher-gınekolog dárigeri Raýshan Ábdýálıeva jer silkinisi kezinde tórtinshi balasyn aman-esen dúnıege ákelýdi kózdegen aıaǵy aýyr áıelge kesar tiligin jasady.
«Náreste men onyń joldasyn qursaq qýysy men jatyrdy kesý arqyly shyǵarý kezinde jan-jaǵymyzdyń dir ete qalǵanyn sezdik. Bul jer silkinisi ekenin túsindik. Degenmen ana men bala ómiriniń qaýipsizdiginiń mańyzyn oılap, operasııany sátti aıaqtaýdy kózdedik. Áıelge julyn anestezııasy berilgendikten, ol nárestesiniń aman-esen dúnıege kelgenin túsinip, jaqsy sezimde boldy. Men úshin onyń sol kezdegi psıhologııalyq tynyshtyǵy bárinen de mańyzdy edi.
Jer silkingenin sezbegen áıel sábıli bolǵanyna qatty qýanǵan. Jurtty úreılendirgen tótenshe jaǵdaıda dúnıege kelgen ul balanyń salmaǵy – 3 910 gramm, boıy – 55 sm. Ananyń da, jańa týǵan náresteniń de jaǵdaıy jaqsy. Bul – dárigerler úshin eń úlken jetistik. Operasııadan shyqqannan keıin otbasyna qońyraý shalyp, olardyń amandyǵyn bilgen dárigerdiń kóńili jaılanǵan.
«Tynyshtyq emosııalardan kúshti ekenin alǵash ańǵardym. Buǵan deıin áıel bosanǵan kezde jer silkinisi bolatynyn elestetip kórmegenmin. Bar nazarymdy qýanyshty oqıǵaǵa aýdarý úreıge berilmeýime kómektesti. Tipti jamandyq oılaýǵa ýaqyt bolmady. Sóıtip, operasııamyz sátti aıaqtaldy. Degenmen bul sát esimizde máńgi saqtalyp qalatyny sózsiz», deıdi dáriger Raýshan Bekjanqyzy.
Jer dúmpýi kezinde osy aýrýhananyń hırýrg-dárigerleri Tahır Shkýralıev, Aıdos Qızatov jáne Aıjaryq Sherhan da 50 jastaǵy naýqasqa operasııa jasap jatqan edi.
«Biz ne bolyp jatqanyn birden túsindik, biraq eshqaısymyz úreılenbeı, sabyrly túrde operasııany jalǵastyrdyq. Jer silkinisiniń kúshi odan joǵary bolsa da, biz naýqasty jalǵyz qaldyrmaıtyn edik. Onyń ómiri men densaýlyǵy bárinen joǵary. Bizdiń emdeý mekemesinde birde-bir dáriger naýqasyn tastap ketpeı, onyń qaýipsizdigi úshin jer silkinisiniń yqtımal zardaptarynan qorǵaýǵa tyrysqanyna senimdimin», deıdi otashy-dáriger Sherhan Muratuly.
Adam ómiriniń saqshysyna aınalǵan aq jeleńdi abzal jandardyń biliktiligimen qosa, meıirimdiligine turǵyndar dán rıza.
Almaty oblysy