AÝLA KLÝBTARYNYŃ BASTAMASY. О́tken aptada Tobyl jaǵasyna shyqqan adamnyń sanynda esep bolǵan joq.
Olardyń barlyǵy da ádettegideı serýendeýdi emes, Qostanaı qalasyn orap aǵatyn ózenniń jaǵasyn qoqystan tazartýdy maqsat tutqan edi. “Birligimiz jarasqan!” aksııasynyń sheńberinde ótken bul ıgilikti isti basqa emes, aýla klýbtarynyń balalary bastady. “Tazalyq” aksııasyna qatysqan balalar, qala turǵyndary, jastar aldymen Tobyl jaǵasyndaǵy Ybyraı Altynsarın babamyz kesenesiniń aınalasyn tazartty. Sonymen qatar jurtshylyq sýǵa shomylatyn jaǵajaılar, adam kóp júretin jerler qoqystan tazaryp qaldy. Ekologııalyq aksııa aýyldarda da jalǵasyn tapty.
Názıra JÁRIMBETOVA, QOSTANAI.
ShYǴARMAShYLYQ О́KILDERIMEN JÚZDESTI. О́tken jumada oblys ákimi Bolatbek Qýandyqov Á.Tájibaev atyndaǵy oblystyq ámbebap ǵylymı kitaphanada Syr aımaǵynyń belgili shyǵarmashylyq ókilderimen júzdesti. Bul kezdesý “Syr óńiriniń rýhanııaty: keshe, búgin, erteń” atty taqyryp aıasynda ótti. Oblystyq shyǵarmashylyq ıntellıgensııa ókilderimen kezdesýde oblys ákimi aımaqtaǵy áleýmettik-ekonomıkalyq baǵyttaǵy atqarylyp jatqan aýqymdy sharalardy egjeı-tegjeıli baıan etti. Ásirese, Elbasynyń basty baqylaýynda turǵan ındýstrııalyq-ınnovasııalyq jobalardyń aımaqta júzege asyrylýyna basa mán berdi. Shyǵarmashylyq ókilderi de óz oı-pikirlerin ortaǵa saldy.
Erkin ÁBIL, QYZYLORDA.
“BALA ShAQTAN – BOLAShAQQA, ANA TILIMEN” . Qazaqstannyń bolashaǵy – memlekettik tilinde. Ońtústik –qazaqy oblys degenmen, orys tildi balabaqshaǵa baryp, orta mektepti orys tilinde támamdaǵan, ana tilinde tili jańa shyqqan baladaı bas jaryp, kóz shyǵaryp sóıleıtin qandastarymyz munda da bar. Oblystyq tilderdi damytý basqarmasy “Ana tili jáne otbasy” jobasy boıynsha úlken baıqaý ótkizdi. Oǵan orys tildi balabaqshalarda tárbıelenip jatqan 4-6 jas aralyǵyndaǵy eki búldirshin, tárbıeshi jáne bir otbasy múshesi top qurap, jarysqa qatysty. Osy baıqaýda Túrkistandaǵy №33 balabaqsha atynan túsken top bas báıgeni jeńip aldy. Al, Maqtaral aýdanyndaǵy “Ásem” balabaqshasy 1-oryn, Túlkibas aýdanynyń “Baldyrǵan” jáne Shymkenttegi “Injý-Marjan” balabaqshalary ekinshi oryn alsa, Kentaýdaǵy “Dáýir” men Qazyǵurt aýdanyndaǵy “Sholpan” balabaqshalary úshinshi orynǵa ıe boldy.
Baqtııar TAIJAN, ShYMKENT.
TÚRKI TILDES TÚGEL BOL!.. Oblys ortalyǵyndaǵy Buqar jyraý atyndaǵy ádebıet jáne óner mýzeıinen bastaý alǵan “Túrki tildes halyqtardyń jazbalar kúni” aptalyǵy “Dostyq úıinde” balqarlar, bashqurttar, qarashaılar, qyrǵyzdar, tatarlar, túrikter, uıǵyrlar, chývashtar, ázirbaıjandar án salǵan tamasha óner festıvaline ulasty. Al jalpy aptalyq “Túrki jazýy – ótkendi taný” atty kórme, chývash halqynyń jazbalary men mádenıeti, túrki álemine arnalǵan poezııa keshi, Mahmud Qashqarıdiń uly muralary atty ádebı oqýlar sııaqty tarıhı-tanymdyq sharalarǵa arnaldy. Aptalyq sońy qalalyq saıabaqta “Qymyzmuryndyq” merekesine jalǵasty.
Farıda BYQAI, PAVLODAR.
BRAZILIIа ELShISI – SYR ELINDE. Brazılııa Federatıvtik Respýblıkasynyń Qazaqstandaǵy Tótenshe jáne ókiletti elshisi Federıko S.Dýke Estrada Maıer Syr elinde bolyp, Baıqońyr ǵarysh aılaǵy, Qorqyt Ata kesenesi, Kókaral bógeti qurylysymen tanysty. Osydan keıin ol óńir basshysy Bolatbek Qýandyqovtyń qabyldaýynda bolyp, eki el arasyndaǵy saıası-mádenı, dostyq qarym-qatynastar keńinen sóz etildi. Oblys ákimi mártebeli meımandy Syr aımaǵynda jasalyp jatqan jobalardan da habardar etti. Kezdesýde oblys ortalyǵynda birlesken óndiris oryndaryn ashý da sóz boldy. Qabyldaýdan keıin elshi buqaralyq aqparat quraldary ókilderine arnaıy suhbat berip, eki el arasyndaǵy qazirgi tańdaǵy taýar aınalymy 37,3 mln. AQSh dollaryna jetip otyrǵanyn atap ótti.
Erkin ÁBIL, QYZYLORDA.
ARNAÝLY ÁNGE BAIQAÝ JARIIаLANDY. Bul kúnde kenshiler shaharynda “Bizder –qaraǵandylyqtar” festıvali ótip jatyr. Osy shara aıasynda “Qaraǵandy saǵan arnaımyz ánimizdi” baıqaýy jarııalandy. Onyń negizgi talaby boıynsha qala týraly áń tańdalyp alynady. Buǵan bastamashy bolýshylardyń biri – Álııa Shoshaqovanyń uıymdastyrýymen jergilikti tele jáne radıo arnalary arqyly atalǵan taqyrypqa arnalǵan ánder jurtshylyqqa tanystyrylýda. Baıqaý qorytyndysy taıaý kúnderi shyǵarylady. Qala turǵyndarynyń qatysýymen tańdalǵan án aldaǵy úlken merekelik sharalardyń birinde shyrqalady. Ol qala ánuranyna aınalady. Sózin jazýshy men ánin shyǵarýshyǵa jáne alǵash oryndaýshyǵa arnalǵan júlde jeńimpazdaryn kútip tur.
Aıqyn NESIPBAI, QARAǴANDY.
“ATAMEKEN” KО́RMESI ShAQYRADY. “Jastar” saıabaǵyndaǵy qazaq jazýshylarynyń pavılonynda ádebıet zertteýshi, abaıtanýshy Qaıym Muhamedhanov jáne jerlesimiz, bıyl 70-ke tolatyn aqyn Tohtarbek Qyzyqbaevqa arnalǵan kórme uıymdastyryldy. Ony ShQO sáýlet-etnografııalyq jáne tabıǵı-landshaftyq murajaı qoryǵy uıymdastyrdy. Kórmede Abaı men Shákárimniń eńbekterin tereń zerttep júrgen Qaıym aǵanyń eńbekteri, shyǵarmalary, qundy sýretter qoıylǵan. Al jerles aqyn, jýrnalıst Tohtarbek Qyzyqbaevtyń kıimderin, qundy zattaryn, qujattaryn, shyǵarmalaryn aqynnyń jubaıy Roza apaı usynǵan kórinedi.
Ońdasyn ELÝBAI, О́SKEMEN.