Almatyda jer silkinisinen keıin zaqymdanǵan ǵımarattardy anyqtaý, qalpyna keltirý boıynsha arnaıy komıssııa qurylǵan. Onyń quramynda tótenshe jaǵdaılar departamenti, Qala qurylysyn baqylaý basqarmasy, aýdandyq sáýletshiler men basqa da ýákiletti organdardyń ókilderi bar, dep jazady Egemen.kz.
Qalalyq ákimdik jer silkinisinen zaqymdanǵan ǵımarattardy qalpyna keltirý úshin kómek alýdyń tártibin túsindirdi.
«Zaqym kelgen nysandar anyqtalǵan jaǵdaıda qala turǵyndary aýdan ákimdigine fotomaterıaldarmen birge ótinish jazýy qajet. Ary qaraı komıssııa músheleri ótinish negizinde zaqymdaný deńgeıin aldyn ala anyqtaý úshin ǵımaratqa kóshpeli tekseris júrgizedi. Iаǵnı, olar tirek qurylymdarynyń buzylýy nemese tóbe, sylaq, kafel, qasbetti árleý sııaqty árleý materıaldarynyń elementterine qatystylyǵyn anyqtaıdy. Aýdandyq komıssııalardyń barlyq materıaly Qalalyq josparlaý jáne ýrbanıstıka basqarmasynda jınaqtalady. Keıin ol Qazaq qurylys jáne sáýlet ǵylymı-zertteý jáne jobalaý ınstıtýtyna (QazQSǴZI) jiberiledi. О́z kezeginde QazQSǴZI mamandary belgili bir nysannyń zaqymdaný sebebi men onyń dárejesi týraly qorytyndy shyǵarady», delingen habarlamada.
Ǵımarattardy jóndeýge ketken shyǵyn túrli qarjy tetikterinen tartylady. Máselen, nysandar búlingen jaǵdaıda ákimdik qarjy bóledi, kóppáterli turǵyn úılerdiń árleý elementteri zaqymdanǵan jaǵdaıda jóndeý jumystary turǵyndarmen ákimdiktiń birlesken kúshimen júrgiziledi, al ǵımarattyń tutastyǵyna zaqym kelse qarjy memlekettik bıýdjetten tartylady.