Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda senatorlar kún tártibine shyǵarylǵan zańdardy qarady jáne depýtattyq saýaldaryn joldady, dep habarlaıdy Egemen.kz Senattyń baspasóz qyzmetine silteme jasap.
Senat depýtattary, aldymen, «1994 jylǵy 9 tamyzdaǵy Qazaqstan Respýblıkasy men Lıtva Respýblıkasynyń arasyndaǵy Azamattyq, otbasylyq jáne qylmystyq ister boıynsha quqyqtyq kómek jáne quqyqtyq qatynastar týraly shartqa ózgeris engizý týraly hattamany ratıfıkasııalaý týraly» zańdy qarap, maquldady. Qujat normalary ózara túsinistik pen egemendikti qurmetteý negizinde eki eldiń azamattyq, otbasylyq, qylmystyq ister boıynsha quqyqtyq kómek jáne quqyqtyq qatynastar týraly shartynyń erejelerin jetildirýdi kózdeıdi.
Sondaı-aq hattamany ratıfıkasııalaý Qazaqstan men Lıtva azamattarynyń quqyqtaryn qorǵaýǵa baǵyttalǵan azamattyq jáne qylmystyq ister boıynsha quqyqtyq kómek kórsetý salasyndaǵy ekijaqty yntymaqtastyqty odan ári nyǵaıtýǵa yqpal etedi.
Sonymen qatar Senat otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań eki oqylymda qaraldy. Azamattardy sapaly jáne qoljetimdi medısınalyq kómekpen qamtamasyz etý, pasıentterdiń memleket kepildik bergen quqyqtaryn iske asyrý, medısınalyq mamandyqtyń mártebesi men bedelin arttyrý osy zańnyń negizgi mindetteri ekenin atap ótken jón.
Zańda azamattardyń medısınalyq kómek kórsetý kezinde densaýlyǵyna keltirilgen zııandy óteý quqyqtaryn qorǵaý sharalary jáne halyqtyń ómir súrý sapasyn jaqsartýǵa baǵyttalǵan basqa da erejeler kózdelgen.
Talqylaý nátıjesinde senatorlar zańdy konseptýaldy túrde qoldady. Sondaı-aq oǵan birqatar ózgeris engizip, qujatty jańa redaksııamen Májiliske qaıtardy.
Naqty aıtqanda, shegilmeıtin temeki buıymdarynyń, veıpterdiń, hosh ıistendirgishter men olarǵa arnalǵan suıyqtyqtardyń aınalymy úshin qylmystyq jaýaptylyqtyń zańmen belgilenýine baılanysty Ákimshilik quqyq buzýshylyq týraly Kodeksten elektrondyq tutyný júıeleri men olarǵa arnalǵan suıyqtyqtardy satý, paıdalaný, demeýshilik kórsetý úshin jaýapkershilikti reglamentteıtin normalardy alyp tastaýǵa qatysty ózgerister engizildi. Odan bólek, taýar belgisiniń elementterin nemese shegilmeıtin temeki buıymdary men veıpterdiń ataýyn paıdalana otyryp, taýarlardy, jumystar men kórsetiletin qyzmetterdi jarnamalaýǵa jáne shegilmeıtin temeki buıymdary men veıpterge suranys pen qyzyǵýshylyqty yntalandyrýǵa arnalǵan júldeler, lotereıalar, utys oıyndaryn ótkizýge tyıym salý usynyldy.
«Zań densaýlyq saqtaý salasyndaǵy ózekti máselelerdi sheshýge jáne densaýlyq saqtaý júıesin odan ári jetildirýge baǵyttalǵan. Jańa normalarǵa sáıkes, endi osy saladaǵy qyzmetkerlerge úzdik jetistikteri úshin «Qazaqstannyń eńbek sińirgen dárigeri» qurmetti ataǵy jáne «О́z kásibiniń úzdigi» ataǵy beriledi. Senat engizgen ózgerister zańnyń jekelegen erejelerin naqtylaýdy kózdeıdi. Aldaǵy ýaqytta zań halyqty qaýipsiz, tıimdi jáne sapaly medısınalyq qyzmetpen qamtamasyz etý júıesin qalyptastyrýǵa oń septigin tıgizedi dep senemiz», dedi Máýlen Áshimbaev.
Otyrys barysynda senator Zakırjan Kýzıev óziniń depýtattyq saýalyn joldady. Ol ruqsat etilmegen qoqys polıgondaryna, jumys istemeıtin qoqys óńdeý zaýyttaryna jáne elde qoqysty suryptaý deńgeıiniń tómendigine qatysty problemalardy kóterip, Úkimettiń nazaryn osy máselege aýdardy. Depýtattyń aıtýynsha, munyń bári tabıǵattyń jáne jer asty sýlarynyń lastanýyna, sondaı-aq, polıgondarda órttiń paıda bolýyna ákeletin qaterler.