Kóktem kelgeli qarǵyn sýdan keler qaýiptiń aldyn alý maqsatynda Almaty oblysynda birqatar jumys atqaryldy. Bul maqsatta sý tasqyny kezeńine daıyndyq is-sharalary jospary bekitilgen.
Máselen, osy jyldyń basynan beri eldi mekenderden 3,7 myń tekshe metr qar shyǵarylǵan. Sondaı-aq 244 shaqyrymdy quraıtyn aryq jelileri, 108 shaqyrym arnalar men avtojoldardyń astyndaǵy 139 birlik jáne temirjoldardyń astyndaǵy 7 birlik sý ótkizý qubyrlary, 65,7 shaqyrym sý burý kanaldarynyń qurylysy tazartylǵan. Sý tasqyny oryn alǵan jaǵdaıda jalpy sany 1 326 adam, 471 birlik tehnıka, 126 motopompalar, 29 birlik júzý quraldary men 35 460 qapshyq qarastyrylǵan, oblystyń azamattyq qorǵaý qyzmetteriniń kúshteri men quraldarynyń toptamasy qurylyp, kómek qolyn sozýǵa saqadaı saı.
Dese de, apat aıtyp kelmeıdi. Kúni buryn Qonaev qalasyna qarasty Qosqudyq aýlynda aýa temperatýrasynyń joǵarylaýyna baılanysty tótenshe jaǵdaı oryn alyp, 5 turǵyn úıdiń aýlasyn sý basqan. Aýyldyń soltústik-batys bóligin egistik pen jazyq jerlerde erigen qar sýy basqany týraly habarlama alǵan oblystyq tótenshe jaǵdaılar departamentiniń qyzmetkerleri dereý iske kirisip, qarǵyn sýdyń odan ári jaıylmaýyna tosqaýyl boldy.
«Qosqudyq aýlyndaǵy Túrksib kóshesinde bes turǵyn úıdiń aýlasyna sý kirgen. Osy kóshede 30 aýla bar. Tótenshe jaǵdaılar departamenti men jergilikti atqarýshy organdardyń kúshteri birlese ınjenerlik tehnıkanyń kómegimen aryq qazylyp, erigen sýdy burý jumystary júrgizildi. Qaýipti seıiltý jumystaryna TJD-nyń 30 qyzmetkeri, bes tehnıkasy men úsh motopompasy, jergilikti atqarýshy organdardan tórt adam jáne tehnıka jumyldyryldy. Zardap shekkender joq. Osy ýaqytta turǵyn úılerdi sý basý qaýpi joıyldy», deıdi Qonaev qalalyq tótenshe jaǵdaılar basqarmasynyń bastyǵy, polkovnık Murat Sydyqov.
Almaty oblysy