Keshe Atyraýda Ulttyq quryltaıdyń úshinshi otyrysy aıasynda jumys seksııalarynyń máslıhattary ótti. Túske deıin Prezıdenttiń kómekshisi Rýslan Jeldibaıdyń moderatorlyq etýimen «Azamattyq qoǵam» seksııasy, sondaı-aq Mádenıet jáne aqparat mınıstri Aıda Balaevanyń moderatorlyǵymen «Mádenıet. О́ner. Rýhanııat» seksııasy jumys istedi.
Al tústen keıin Premer-mınıstrdiń orynbasary Tamara Dúısenovanyń jetekshiligimen «Áleýmettik-ekonomıkalyq jáne aımaqtyq damý» seksııasynyń, Ǵylym jáne joǵary bilim mınıstri Saıasat Nurbektiń moderatorlyq jasaýymen «Bilim jáne ǵylym» seksııasynyń otyrysy ótti. Jalpy alǵanda, tórt seksııanyń jumysynda Ulttyq quryltaıdyń 70-ke jýyq múshesi sóz sóılep, 100-den asa usynys pen bastama kóterildi.
Seksııalarda aıtylǵan usynystardyń basym bóligi qoǵam birligin odan ári nyǵaıtý, jalpyulttyq qundylyqtardy dáripteý, eldiń ǵylymı áleýetin kóterý, mádenıet salasyn qoldaý, jergilikti ózin-ózi basqarý júıesin damytý, kóshi-qon máselesin retteý jáne qoǵamdaǵy ózge de ózekti máselelerge qatysty jasaldy. Ulttyq quryltaı músheleriniń mundaı belsendi qyzmeti atalǵan azamattyq ınstıtýttyń qoǵam men memleket arasynda tıimdi dıalog alańyna aınalǵanyn kórsetedi.
Erlan QARIN,
Memlekettik keńesshi