Jańa mazmunda toılanatyn Naýryz merekesi qarsańyndaǵy «Mádenıet jáne ulttyq salt-dástúr» kúni aıasynda Qyzylorda qalasyndaǵy S.Aıtbaev atyndaǵy kórkemsýret galereıasynda Qazaqstan Sýretshiler odaǵynyń múshesi, kreatıv-sýretshi Dáýletbek Toıshybaevtyń «Kilem Art» atty kórmesi kóp nazaryn aýdardy.
Kórmeniń ashylýynda oblystyq mádenıet, arhıvter jáne qujattama basqarmasynyń basshysy Mıra Qazbekova ulttyq qolóner dástúrin damytqan jańashyl janr sheberiniń jumystary osyǵan deıin de elimizdiń ár túkpirinde kórermen nazaryna usynylǵanyn atap ótti. «Memleket basshysynyń kreatıvti ındýstrııany damytý baǵytyndaǵy tapsyrmasyn oryndaý maqsatynda byltyr ǵana ashylǵan «Anaǵa taǵzym» ortalyǵy júıeli jumys jasap tur. Ortalyqtyń birinshi qabatynda jergilikti sheberlerdiń kórmeleri, túrli jármeńkeler uıymdastyrylyp keledi. Ondaǵy «Qazaq eliniń uly analary» kartınasy avtorlarynyń biri búgingi kórme ıesi Dáýletbek Toıshybaev», dedi basqarma basshysy.
Shaǵyn kilemder betine túsken Saq sulýy, Syǵanaq arýy, Begim ana, Qyz Jibek, Dına kúıshi, jalpy 12 kilem-kartınadaǵy beıneniń bári Syr qyzdarynyń arnaıy túsken fotolarynan kóshirilgen. «Jalpy, osy jumysym arqyly men qazaqtyń belgili analarynyń galereıasyn zamanaýı ádispen jasaǵym keldi. Jurt qyzyǵýshylyǵy men suranysqa qaraǵanda talabym teris bolmaǵan sııaqty», deıdi realıst sýretshi.
Jergilikti Qorqyt ata ýnıversıtetin bitirgen ol osy ýaqytqa deıin birqatar baıqaýdyń bas júldesin ıelenip, jumystary respýblıkalyq, halyqaralyq kórmelerge qoıylǵan. Zamanaýı sýretshi strıng-art ádisi arqyly qala sáýletin kreatıvti mýraldarymen baıytyp júrgen óner ıesi.
Qyzylorda