Túrkistan qalasynda Ulystyń uly kúnine arnalǵan «Tórlet, Naýryz, tórime» atty respýblıkalyq komandalyq aıtys ótti. Ulttyq ónerdiń 5 janry boıynsha Túrkistan men Jambyl oblystarynyń aqyndary jáne ónerpazdary ózara myqtyny anyqtady.
Jańa formatta, ıaǵnı án óneri men kúı, terme janrlary jańǵyra Syr óńirinen bastaý alǵan aıtysty kópshilik qaýym ulttyq ónerdi damytýǵa jasalǵan oń qadam retinde baǵalaýda. Komandalyq aıtysqa qatysýshylarǵa sáttilik tilegen oblys ákimi Darhan Satybaldy bul jobanyń ónersúıer qaýymǵa bereri mol ekenin atap ótti. Al Jambyl oblystyq mádenıet, arhıvter jáne qujattama basqarmasynyń basshysy Erlan Júnisbaı oblys ákiminiń quttyqtaý sálemin jetkizdi. Alaman báıgeni Qazaqstannyń eńbek sińirgen qaıratkeri, Májilis depýtaty Amanjol Áltaev júrgizdi.
Túrkistan oblysynan Bekarys Shoıbekov, Shahmardan Bekarysuly, Nurmahan Jaqypbek, Aıaz Rústemov, Aıan Nııazbek, Jandos Qulymbetov, Qajymuqan Abzalov, Maǵjan Áltenbaev, Dáýren Aqsaqalov, Rýslan Ahımbekov, al Jambyl oblysynan Ahmetjan О́zbekov, Mansur Erkebulanuly, Darhan Ábdimanat, Bekarys Kóshtaev, Ashat Qylyshbek, Dıdar Basyǵaraev, Qanat Myrzahan, Mereı Ábýeva, Alına Aıdaraly, Maralbek Babaqulov óz óńiriniń namysyn qorǵady. Aldymen jyrshy-termeshiler saıystyń kórkin qyzdyrsa, odan soń kúmis kómeı ánshiler dástúrli ánniń tıegin aǵytyp, qulaq quryshyn qandyrdy. Al aıtys aqyndary qyz ben jigit súre jáne qaıym aıtys kórsetip, kórermenge erekshe rýhanı kesh syılady. О́nersúıer qaýymnyń kóńilinen shyqqan tartysty dodanyń nátıjesinde Qazaqstannyń halyq aqyny Ásııa Berkenova bastaǵan qazylar alqasynyń sheshimimen respýblıkalyq komandalyq aıtystyń ekinshi kezeńine Túrkistan oblysynyń komandasy joldama alyp, jeńimpaz atandy. Qos komandaǵa birdeı qurmet kórsetilip, árbir aqynǵa 500 myń teńgeden syıaqy berildi. Al jyrshy, termeshi, dástúrli ánshi, kúıshilerge 250 myń teńgeden tabystaldy. Sondaı-aq «Amanat» partııasynyń arnaıy syılyǵy berildi.
Aıta ketelik, baıqaýdyń talaptary men sharttaryna sáıkes, birinshi kezeńge 20 komanda qatysyp, ekinshi kezeńge 10 komanda ótedi. Osy 10 komandanyń ishinen baldyq júıe boıynsha úshinshi kezeńge 4 komanda joldama alady. Jeńgen 2 komanda 2025 jyly Astana qalasynda ótetin aqtyq saıysqa qatysady.
TÚRKISTAN