Short-trekten Nıderlandtyń Rotterdam qalasynda ótip jatqan álem chempıonatynda 28 jastaǵy qostanaılyq sportshy Denıs Nıkısha kúmis medaldy oljalady.
Jerlesimiz 500 metrlik qashyqtyqty 41.676 sekýndta júgirip ótti. Ol tek Qytaıdyń ataqty sportshysy Sıaoszıýn Lınnen qalyp qoıdy. Qola medaldy kanadalyq Djordan Per-Jıl ıelendi. Osylaısha, Qazaqstannyń ulttyq quramasy óz tarıhynda tuńǵysh ret eresekterdiń dúnıejúzilik dodasynda júlde aldy.
Jalpy, Denıs Nıkıshanyń jankúıelerin qýantyp júrgenine birer jyldyń júzi boldy. Atap aıtsaq, 2014 jáne 2015 jyldary ol Túrkııanyń Erzýrýmy men Japonııanyń Osakasynda uıymdastyrylǵan jastardyń álem birinshiliginde qola medaldy moınynda jarqyratty. 2017 jyly Almaty men 2019 jyly Krasnoıarskide alaýy tutanǵan Dúnıejúzilik Ýnıversıadada tórt ret úshinshi orynǵa taban tiredi. Álem kýboginiń kezeńdik saıystarynda 2 altyn, 4 kúmis jáne 4 qolany enshiledi.
Sonymen qatar otandasymyz úsh birdeı Olımpııa oıyndaryna qatysty. 2014 jyly Sochıdegi estafetalyq saıysta Denıs besinshi oryn alsa, 2018 jyly Phenchhanda altynshy satyǵa jaıǵasty. Al 2020 jyly Beıjiń Olımpıadasynyń 500 metrlik básekesinde segizinshi orynǵa turaqtasa, 2000 metrlik saıysta úzdik bestikti túıindedi.