Astanada grek-rım kúresinen Alashtyń ardaq tutar azamaty, Olımpıada jáne álem chempıony, Qazaqstannyń Eńbek eri Jaqsylyq Úshkempirovti eske alýǵa arnalǵan jastar arasyndaǵy (U-20) halyqaralyq týrnır aıaqtaldy.
Atalǵan jarysta Qazaqstannan bólek, Saýd Arabııasy, Belgııa, Horvatııa, Ýkraına, Ázerbaıjan, Qyrǵyzstan, Reseı, Tájikstan, О́zbekstannan kelgen 234 balýan baq synady. Alǵashqy kúni tórt salmaq dárejesiniń túrli tústi medaldary sarapqa salyndy. Sonyń birinde qandasymyz Erasyl Jeńiske teń keler eshkim tabylmady. 82 kg salmaq dárejesinde kúresken ol fınalda ázerbaıjandyq Ismaıl Rzaevqa san soqtyrdy.
Báseke aıaqtalǵan bette BAQ ókilderine suhbat bergen Erasyl: «Jarysqa eki apta boıy «Almataý» sport bazasynda daıyndaldyq. Qazir sonyń jemisin kórip otyrmyz. Birde-bir básekede jeńis ońaılyqpen kelgen joq. Barynsha nátıjeli óner kórsetý úshin kóp kúsh saldym. Ásirese fınaldyq saıys qıynǵa soqty. Beldesý barysynda Ázerbaıjannyń balýanynan 2:7 esebimen utylyp jattym. Biraq jeńis tuǵyrynyń eń bıik satysyna kóterilsem degen oı meni alǵa jeteledi. Nátıjesinde, sheshýshi tusta qarsylasymnyń osal tusyn taýyp, jarys jeńimpazy atandym», dep aqtaryla sóıledi.
55 kg salmaqta beıtarap sportshy retinde óner kórsetken reseılik Álibek Ámirovtiń asyǵy alshysynan tústi. Fınalda ol jerlesimiz Aıbek Aıtbekovten aılasyn asyrdy. 63 kg salmaq dárejesinde de Reseıden kelgen sportshynyń baǵy jandy. Aqtyq synda Erzý Zákarıev bizdiń Damır Ibrashevti eńserdi. 72 kg salmaqta Rýslan Nurýllaevqa teń keler eshkim tabylmady. Ázerbaıjannyń úmiti sheshýi tusta Taıyr Amangeldini súrindirdi.
Odan keıingi kúnderi Ońdasyn Hamıtov (60 kg), ázerbaıjandyq Faraım Mustafaev (67 kg) pen Davýd Mamadov (77 kg), ýkraınalyq Egor Iаkýshenko (97 kg) jáne reseılik Mansur Saıtov (87 kg) pen Aleksandr Melehov (130 kg) syndy saıypqyrandar jeńis tuǵyrynyń eń bıik satysyna kóterildi. Komandalyq esepte beıtarap komanda retinde qatysqan Reseı balýandary birinshi oryn alsa, Ázerbaıjan men Qazaqstan quramalary ekinshi jáne úshinshi oryndy ózara bólisti.
Dańqty sportshy Jaqsylyq Úshkempirovti eske alýǵa arnalǵan týrnırdiń júlde qory da mol boldy. Máselen, bas júldeni qanjyǵalaryna baılaǵan balýandar 1,5 mıllıon teńgeden alsa, kúmiske qol sozǵandar 1 mıllıondy ıelendi. Qola medaldy moınyna ilgen sportshylar 500 myńdy qaltaǵa basty. Al chempıondy tárbıelegen jattyqtyrýshylarǵa 100 myń teńgeden berildi.