«Astana» halyqaralyq qarjy ortalyǵynyń (AHQO) qatysýshylary ótken jyldyń sońyna qaraı el bıýdjetine 85,2 mlrd teńge shamasynda salyq tólegen. Bıyl qańtar aıynda tólengen salyq somasy 90 mlrd teńgeden asyp otyr. Mamandar bul 2018 jylǵy somadan shamamen 60 ese kóp ekenin aıtady. Osydan eki jyl buryn atalǵan ortalyqtyń retteý júıesi Ekonomıkalyq yntymaqtastyq jáne damý uıymynyń (EYDU) salyq ashyqtyǵy standartyna saı keldi dep tanylǵan.
«AHQO – óńirdegi jetekshi qarjy ortalyǵy jáne biz eń aldymen kapıtal qozǵalysyna yqpal etetin ınfraqurylymdy quryp, damytýdy kózdeımiz. Tirkelgen qatysýshylardyń sany, qarjylyq kompanııalar sanynyń ósýi, Qazaqstan ekonomıkasyna tartylǵan ınvestısııalar kólemi men qatysýshylardyń el bıýdjetine tólegen salyǵynyń somasy, sondaı-aq mámile kólemi, AIX bırjasy arqyly tartylǵan kapıtal – bunyń bári ortalyq jumysynyń tıimdiligin kórsetedi. AIX bırjasy arqyly 2023 jyldyń sońynda 4,6 mlrd dollar tartylsa, AHQO qatysýshylarynan tikeleı ınvestısııa 6,3 mlrd dollardy qurady», deıdi AHQO basqarýshysy Renat Bekturov.
2023 jyly kólik, logıstıka, agroónerkásiptik jáne óndiristik keshender, jańartylatyn energııa kózderi (JEK), IT-sala sekildi birqatar baǵyt belsendi damı túsken. AHQO akademııasy bilim berý jáne korporatıvtik oqytý baǵdarlamalary sheńberinde qarjy, ınvestısııalyq menedjment, táýekelderdi basqarý, qarjy tehnologııalary jáne basqa da salalar boıynsha 18 myńnan asa mamannyń bilimin jetildirdi. Ortalyq jumys isteı bastaǵan 2018 jyldan beri qatysýshylar sany udaıy artyp, ortasha jyldyq ósimi qosymsha 460 kompanııany quraǵan.
2024 jyly aqpan aıynda ortalyqqa tirkelgen qatysýshy sany 78 elden sheteldik kapıtalmen qurylǵan kompanııalardy qosa alǵanda, 2500-den asty. Olardyń kóbi qarjy, aqparat jáne baılanys, kóterme jáne bólshek saýda, óndiris pen paıdaly qazbalardy óndirý sekildi salalarǵa tıesili bolyp tur.
Osy rette AHQO-nyń barlyq qatysýshy-kompanııasy Qazaqstannyń salyq rezıdentteri ekenin jáne elimizdiń salyq zańnamasyna sáıkes esep júrgizýge, sonymen qatar salyq jeńildikterine qaramastan tıisti eseptilikti tapsyrýǵa mindetti ekenin atap ótken jón. Salyq jeńildikteri negizinen qarjylyq, naryqtyq qyzmetterdi júrgizý nemese kásibı qyzmetter kórsetý úshin AHQO retteýshisinen tıisti lısenzııa alǵan kompanııalarǵa qoldanylady.
Ortalyq ınvestısııalardy tartý boıynsha merziminen buryn nátıjege qol jetkizip, aldyna jańa maqsattar qoıyp otyr.
«Qazirdiń ózinde AHQO arqyly el ekonomıkasyna 10,9 mlrd dollardan asa qarajat tartyldy. 2025 jylǵa deıingi damý strategııasynda qoıylǵan mindet oryndaldy. Ortamerzimdi perspektıvada biz ınfraqurylymdy damytýdy jalǵastyramyz jáne naryqqa kómirtegi kvotasy men turaqty qarjylandyrý sııaqty suranysqa ıe quraldardy usynatyn bolamyz», deıdi Renat Bekturov.