Jerimizge máńgilik jańǵyrý men jańarýdyń jarshysyndaı bolyp Naýryz merekesi qadam basty. Kóktem kúshine enip, jer kógeretin, el marqaıyp, rızyǵymyz molaıatyn, dostyǵymyz ben yntymaǵymyz nyǵaıatyn jyl bastaýynda aıtylar aǵa býyn men jastyń, zııaly qaýym men bas kóterer azamattardyń ıgi tilegi mol. Jer-ananyń býsap, tirshiliktiń jańaryp, kún men túnniń teńelip, ózgeshe keıipke enetin aıda aıtylǵan aq tilekter jaqsylyqtyń bastaýyndaı, ıgi bastamanyń qaınar bulaǵyndaı.
Ábilhakim AQMYRZIN,
Densaýlyq salasynyń úzdigi, «Qurmet» ordeniniń ıegeri:
– Naýryzda qys pen jaz mámilege kelgendeı bolyp, jerdiń tońy jipsip, tirshilik oıanyp, qursaqtaǵy dán búrlene bastaıdy. Jyl basynyń osy tirshiliktiń oıanýymen oraılas kelýi jaratylystyń zańdylyǵy da sııaqty. Ony ata-babalarymyz erte zamannan-aq juldyzǵa qarap jobalap, kún men túnniń teńelýine qarap tuspaldaǵan. Aýzym aqqa tıdi dep adam qýanatyn, tisim kókke tıdi dep mal-jan jubanatyn ulys kúni – túlep jańarǵan tabıǵattyń, jańǵyryp jasarǵan jaratylystyń jylýy, jaryǵy molaıǵan búkil dúnıeniń meıramy.
Naýryz meıramy endi Memleket basshysynyń tapsyrmasymen daıyndalǵan arnaıy tujyrymdama boıynsha atalyp ótetin boldy. Sonyń aıasynda baǵzy zamannan bergi tabıǵatpen úndes baıyrǵy ıgi salt-dástúrlerimiz, izgi ádet-ǵuryptarymyz jańǵyryp jatyr.
Naýryz – búkilhalyqtyq mereke, bizdiń jerimizde eńbek etip jatqan barshanyń ortaq merekesi. Biz bul kúnderi Jer-anany aıalaý, tabıǵatty qasterleý jónindegi paryzymyzdy oryndap, eselep eńbek etýge, kóńilimizde meıirbandyq pen baýyrmaldyq, kishipeıildilik pen qaıyrymdylyq sezimin uıalatýǵa tıispiz.
«Ulystyń uly kúni qazan tolsa, aq mol bolady. Uly kisiden bata alsań, oljaly jol bolady» demekshi, meıirban halqymyzǵa, árbir otbasyna qut-bereke ákelsin! Aq saqaldy atalardyń, aq jaýlyqty analardyń tilegi barshanyń kókiregine nur bolyp quıylsyn! Kún táńir, nuryńmen aıala, Jer táńir, yrysyńdy aıama!
Elen ÁLIMJAN,
jazýshy-dramatýrg, halyqaralyq «Alash» ádebı syılyǵynyń ıegeri:
– Qansha jerden resmı kúntizbeni negizge alyp, jańa jyldy álemnen qalmaı qańtarda qarsy alǵanymyzben, ózimizdiń tól Naýryzdy báribir birinshi orynǵa qoıamyz. О́ıtkeni Naýryzdyń naǵyz jyl basy ekenin ata-babalarymyz, shyǵys halyqtary baǵzy zamannan-aq bilgen.
Naýryz – Jer-ananyń býsap, tirshiliktiń jańaryp, kún men túnniń teńelip, ózgeshe keıipke enetin aıy. Kúlli túrki ulysyna ortaq Ulystyń uly kúni áz Naýryz merekesi de – qazaq halqy úshin erekshe meıram. Ulttyń uly salt-dástúrine negizdelgen aıtýly merekeniń kópshilikke berer tálimi men taǵylymy da mol. Bul kúni qystan aman shyqqan halyq bir-birimen kórisip, hal surasyp, keler kúnderden jaqsy úmit kútedi, bir-birine ıgi tilegin arnaıdy. Bul da – halqymyzdyń ǵasyrlar boıy jasap kele jatqan ejelgi dástúri, keler urpaqqa kórsetken jaqsy ónegesi.
Búginde elimizde Naýryz merekesi jańasha atap ótilip jatyr. Onyń ishinde Jambyl oblysynda da Ulystyń uly kúni joǵary deńgeıde uıymdastyrylyp júr. Kóktem shyǵyp, Naýryz aıy týa salysymen óńirde kógaldandyrý jumystary qarqyn alady.
Jalpy, bul jyl basynan barlyq izgi nıetti adamdar sııaqty men de jaqsylyq kútemin. Sony tileımin. Qaı zamanda da jaqsylyqtyń eń tóresi – beıbitshilik. Tynyshtyq bolsa, toqshylyq bolady. Sonaý 1986 jyly bastalǵan tarıhı silkinisten óziniń kisilik qasıeti arqasynda qantógiske urynbaı, «sulý tory attaı» bolyp ádemi shyqqan Qazaq eli Ulý jyly da ultqa qyzmet qylar uly isterin, Táýelsizdigin odan ári nyǵaıta túspek. Ádiletti Qazaqstan ıdeıasyn temirqazyq etip, alǵa qaraı nyq basady dep senemin.
Tól merekemiz qutty bolsyn! Qazaqqa Jaratýshy ıe qashanda jar bolsyn!
Dáýlet MUQAEV,
Májilis depýtaty:
– Jastar – qoǵamnyń bir bóligi retinde memlekette mańyzdy ról atqarady. Sondyqtan Prezıdent Qasym-Jomart Toqaev jastardyń búgini men bolashaǵyna qamqorlyq jasaýdy óz saıasatynyń negizgi máni dep sanaıdy.
Qazir shetel asyp, oqý bitirgen jas mamandar qatary da jyl sanap bılik tarmaqtaryn tolyqtyryp jatyr. Osylaısha, elde sapaly, bilikti kadr jasaqtalyp keledi. Desek te elimizde jastardyń áleýmettik-ekonomıkalyq jaǵdaıy túbegeıli sheshimin tapty deý qıyn. Respýblıka boıynsha 35-ke deıingi otandastarymyzdyń baspanasyz júrýi, megapolısterden bólek, qala men shalǵaıdaǵy eldi mekenderdegi azamattardyń eki qolǵa bir kúrek tappaı sendelýi, odan qaldy bilim deńgeıi men densaýlyǵy, memlekettik baǵdarlamalar týraly habardarlyǵynyń tómendigi – áli de ózekti kúıinde qalyp otyrǵan túıtkil.
Prezıdent jyl saıynǵy dástúrli Joldaýlarynda osy jastar saıasatyn jetildirý boıynsha irgeli tapsyrmalar júktep júrgeni belgili. Taıaýdaǵy úshinshi shaqyrylǵan Ulttyq quryltaıda da Memleket basshysy: «Kóp uzamaı memleketti basqarý isi, ıaǵnı el tizgini búgingi jastardyń qolyna ótedi. Sizder osy jaýapkershilikti qazirden bastap sezinýlerińiz qajet. О́zderińizge júkteletin tarıhı mıssııany oryndaýǵa qashanda daıyn bolýlaryńyz kerek», dep qadap aıtty. Demek biz bolashaǵy jarqyn, qýatty memleket qurý úshin ónimdi eńbek etip, sapaly bilim alyp, ortaq maqsatqa jumyla bilýimiz kerek. Jańa jyl bastaýy Naýryz qarsańynda júktelgen mindet sapaly oryndalyp, kózdegen mejege jetemiz dep oılaımyn. Eldi kórkeıtip, memlekettiń ornyqty damýyna sep bolamyn degen urpaq jalyny óshpesin.
Bıyl erekshe jaǵdaıda atalyp ótip jatqan Naýryz – eń aldymen, eńbek meıramy, halyqtyń toıy. Jyl basy janymyzdy jadyratsyn, júregimizge shattyq syılasyn!