Naýryz meıramy qarsańynda elordalyq vokzaldardyń perronynan №3/4 «Astana-Almaty», №85/86 «Astana-Shymkent» jáne №7501/7502 «Astana-Pavlodar» baǵyttary boıynsha etnıkalyq stılde bezendirilgen poıyzdar reıske shyqty. Jolaýshylardy ulttyq kıim kıgen jolserikter qarsy aldy, dep habarlaıdy Egemen.kz «Jolaýshylar tasymaly» AQ baspasóz qyzmetine silteme jasap.
Is-shara barysynda jolaýshylar men shyǵaryp salýshylar úshin qazaq halqynyń mádenıetiniń basty sımvoly - dombyrada mýzykalyq súıemeldeý uıymdastyryldy. Sonymen qatar árbir jolaýshyǵa merekelik kóńil-kúı syılaıtyn elimizdiń ulttyq taǵamdary «naýryz kóje» men «baýyrsaq» usynyldy.
«Elimizde atalyp ótetin merekelermen jolaýshylardy quttyqtaý kompanııanyń ıgi dástúrine aınaldy. Aıta keteıik, «Jolaýshylar tasymaly» AQ kompanııasy jyl saıyn jolaýshylarǵa merekelik kóńil-kúı syılaı otyryp, poıyzdardy erekshe stılde bezendirýdi ádetke aınaldyrǵan», dep atap ótti «Jolaýshylar tasymaly» AQ Bas dırektory Jánibek Taıjanov.
Etnıkalyq stıldegi poıyzdar 2024 jyldyń naýryz aıynyń sońyna deıin júredi.
Aıta keteıik, bul merekelik aksııa elimizdiń barlyq óńirlerinde ótkiziledi. Kompanııanyń jolserikteri men qyzmetkerleri poıyzdardyń ishinde jáne perrondarda barlyq jolaýshylardy Naýryz meıramymen quttyqtaıdy.