Naýryz meıramyn merekeleý aıasynda kórnekti ǵalym Qanysh Imantaıuly Sátbaevtyń týǵanyna 125 jyl tolýyna arnalǵan oblystyq oqýshylar aıtysy bolyp ótti.
Sátbaev qalasyndaǵy Sh.Dildebaev atyndaǵy Kenshiler saraıynda «Nar tulǵa, taý tulǵa!» taqyrybymen ótken aıtysqa Jezqazǵan, Sátbaev qalalarynyń, Jańaarqa, Ulytaý aýdandarynyń mektep oqýshylary qatysyp, sóz kórigin qyzdyrdy.
Syr súleıi Turmaǵambet Iztileýulynyń ózinen keıingi tolqynǵa qarap turyp, «Súırikteı sýdan shyǵyp kele jatqan, Jas aqyn jáne de kópsózdi nastar. Jańartpaı bular jurtty qoıady ma, Bolǵan soń bireýi – tys, bireýi – astar» dep súıispenshilik bildiretini sekildi, oqýshylar aıtysyna qatysqan talapkerlerdiń aıaq alystryna qarap, olardyń erteńi tanylǵandaı boldy.
Aıtystyń arasynda kórermender jas jyrshy-termeshilerdiń ónerlerin de tamashalady.
«Luqpan Hakim «Urpaǵymmen myń jasaımyn» degen ǵoı. Sol aıtpaqshy, ulttyq tamyrdan nár alǵan ónerli ul-qyzdarymyzdy kórgende qýanamyn, elimizdiń erteńin kórgendeı bolamyn. Jetkinshekter arasynda osyndaı is-sharalardy jıi ótkizip tursaq, utarymyz kóp bolmaq. Jastar birte-birte jetiledi, shyńdalady», – dedi ónerli jastarǵa súısinisin bildirgen Qazaqstan Jazýshylar odaǵynyń múshesi, aqyn Musa Tileýov.
Aıtystyń 100 myń teńgelik bas báıgesi jezqazǵandyq 8-synyp oqýshysy Juban Kamalbekke buıyrdy.
Ulytaý oblysy