Búginde elimizdiń ishki tynyshtyǵynyń kepili – Ulttyq ulannyń qatarynda jaýyngerlik qyzmet atqaryp júrgen ózge etnos ókilderi kóp. Olardyń túri men tili bólek bolǵanymen, jany men rýhy bir, elimizdiń keń-baıtaq jerinde tatýlyq pen birliktiń týyn kóterip, týǵan Otandy qorǵaýda bir úıdiń balasyndaı qyzmet etip keledi.
Solardyń biri – 6698 áskerı bólimi 2-atqyshtar rotasynyń qatardaǵy jaýyngeri Rashat Ardafılov. Ol 2023 jyldyń jeltoqsan aıynda Ulttyq ulan qataryna merzimdik áskerı qyzmetke shaqyryldy. Ulty ázerbaıjan. Qazirgi tańda 6698 áskerı bólimniń 2-atqyshtar rotasynda jaýyngerlik qyzmet atqaryp júr.
«Mektepti orys synybynda aıaqtadym. Alaıda bala kezden ósken ortam, dostarym ártúrli etnos ókili boldy. Biraq bárimiz qazaq tilinde sóıleıtinbiz. Men óz ana tilimde de, qazaq tilinde de erkin sóıleımin. Bir aýdanda, bir kóshede qanshama etnos ókilderi turamyz: ózbek, túrik, uıǵyr, orys. Merekelerdi birge toılaımyz. Ásirese Naýryz bárimiz úshin ortaq, úlken mereke edi, óte qyzyqty bolatyn. Ár ult óziniń dástúrimen erekshe atap ótetin», deıdi Rashat. – Biz demalystarda Otanymyz Ázerbaıjan eline baryp turamyz, alaıda týǵan jerimiz Qazaqstannan kóship ketpeıtinimizdi atam sanamyzǵa quıyp qoıǵan. Atam otstavkadaǵy polkovnık, ol meniń de áskerı joldy tańdaýymdy qalady, bolashaqtaǵy armanym – bilikti ofıser bolý.
1-atqyshtar rotasynyń qatardaǵy jaýyngeri Ravıl Avakrıev 2005 jyly Almaty oblysynyń Uıǵyr aýdanyna qarasty Shonjy aýlynda dúnıege kelgen. Ulty uıǵyr. Ata-anasy – qarapaıym sharýa adamdary. 9-synypty aıaqtaǵan soń orta arnaıy bilim alý maqsatynda kolledjge oqýǵa túsedi. Mektepte uıǵyr tilinde bilim aldy, al kolledjde qazaq tobynda oqydy.
– Biz úshin túrik, ózbek, qazaq, azerbaıjan sııaqty túrkitildes elderdiń tilinde sóıleý tańsyq emes. Sóz ıirimderi uqsas bolǵandyqtan, ońaı ári tez úırendik. 2023 jyldyń jaz aıynda ásker qataryna keldim. Kózdi ashyp jumǵansha 8 aıdan asa ýaqyt ótti, – deıdi Ravıl. – Búgingi tańda eliń úshin qyzmet etseń, barlyq jaǵdaı jasalǵan. Sonyń biri – áskerden keıin tegin bilim granttarynyń sertıfıkattaryn alý. Osy sertıfıkattyń birine ıe bolý úshin barymdy salyp qyzmet atqaryp júrmin. Týǵan jerimniń tynyshtyǵyn kúzetý men úshin – abyroıly is. Qasıetti qyzmettiń arqasynda joǵary bilimniń kiltin qolymyzǵa ustatatyn Ulttyq ulanǵa úlken rızashylyǵymdy bildiremin.
2-atqyshtar rotasynyń qatardaǵy jaýyngeri Imran Karımov 2000 jyly týǵan. Ulty túrik. Mamandyǵy – tis dárigeri. Ásker qataryna jaqynda ǵana keldi. Azamattyq boryshyn oıdaǵydaı aıaqtap shyqqan soń, kelisimshart boıynsha áskerı qyzmetti jalǵastyrý oıynda bar.
– Atamnyń áńgimesinen estip-bilgenim – olar 1945 jyldary, soǵystan keıingi almaǵaıyp kezeńde Kavkaz halyqtarymen birge Qazaqstanǵa qonys aýdaryp, Almaty oblysyndaǵy Esik qalasyna jaıǵasqan eken. Úlkenderdiń esten ketpes estelikteriniń biri – sol bir qıyn ýaqytta qazaq halqynyń «ózge elden kelgen» dep ózekten teppeı, baýyryna basyp, barymen bóliskendigi. Daladaı darqan qazaq eliniń sheksiz meıirimi men qaıyrymdylyǵy arqasynda bir qaýym el bolyp órken jaıdyq dep, sol kezdegi bala, búgin seksenniń seńgirindegi qarııalar qazaq halqyna áli kúnge alǵystaryn jaýdyryp otyrady, – dedi Imran. – Sol turǵyda táýelsiz qazaq eliniń áskeri qatarynda qyzmet etý men úshin – úlken jaýapkershilik, zor mindet. Bizge beıbit zaman, jarqyn bolashaq syılaǵan batyr babalaryma sheksiz alǵys aıtamyn. Birlik, bereke, yntymaq merekesi – Naýryz qutty bolsyn.
1-atqyshtar rotasynyń qatardaǵy jaýyngeri Almas Syrymbetov 2005 jyly kıeli Tarazdyń Shý óńirinde dúnıege kelgen. Ulty tatar. Mamandyǵy – aspazshy. Anasy da kondıterlik ispen aınalysady. Anasynyń qasynda aspazdyqtyń qyr-syryn úırene júrip, osy mamandyqtyń ıesi bolamyn dep sheshipti. Ásker qataryna ótken jyldyń jeltoqsan aıynda keldi.
– Meniń áskerge deıin de qazaq dostarym kóp boldy. Ákem erte qaıtys bolǵandyqtan, anamnyń qasynda er azamat retinde úıdiń bar aýyr tirligin qolyma alýǵa tyrystym. Ákemniń joqtyǵyn bildirtpeı úıdiń bolsyn, túzdiń bolsyn aýyr jumysyn atqarýǵa únemi qolushyn sozatyn dostarym edi. Áskerge ketip bara jatyp, anamnyń jalǵyz qalǵanyn ýaıymdaǵanym ras. Alaıda dostarymnyń ornymdy bildirmeı, úıimniń tirshiligine, anama qaraılasatyny – kóńilge medeý. Áskerge kelip te jarqyn minez, janashyr dostar taptym, – dedi Almas. – О́zara jaýapkershilik pen qamqorlyqtyń, rýhanı jaqyndyqtyń belgisi – dostyq degen uly sezimdi qadirleı bilgen, janyma jaqyn jandarǵa, adal dostaryma aıtar alǵysym kóp.
Ulys kúni qorǵanys kúshteri qurylymdarynda da birlik, tatýlyq, týystyq, otbasyny qasterleý sııaqty adamzattyq qundylyqtarǵa negizdelip atap ótiledi. Elimizdegi barsha halyqtarǵa ortaq meıram qoǵamda saıası turaqtylyqty, beıbitshilik pen tynyshtyqty, dostyq pen kelisimdi nyǵaıtýdyń tetigine aınala túsedi.