Astanadaǵy ulttyq akademııalyq kitaphanada dıplomat, ǵalym Mursal-Nábı Tuıaqbaevtyń «Qazaqstan-Fransııa mádenı dıplomatııa aıshyqtary» atty kitabynyń tanystyrylymy ótti. Is-sharaǵa ǵalymdar men aqyn-jazýshylar, shetelderdiń dıplomatııalyq toptarynyń ókilderi qatysty. Mádenı jıyndy qalamger Ákim Ysqaq júrgizdi.
Eń áýeli Á.Ysqaq quttyqtaý sózinen keıin, avtordyń tulǵalyq bolmysy men eńbek jolyna toqtalyp, kitaptyń mazmuny tóńireginde oıyn ortaǵa saldy. «Munda qos memlekettiń saıası-mádenı ustanymdary, basqarý júıesi taqyrybynda keshendi zertteý júrgizilgen. Sonymen qatar sol ýaqytta Fransııa bıliginde bolǵan Nıkolıa Sarkozı, ony aýystyrǵan Fransýa Ollandtyń el basqarýdaǵy erekshelikteri týraly keńinen baıandaıdy. Qazaqstan men Fransııa arasyndaǵy ekijaqty qatynastyń damý barysyna maman retinde baǵa beredi. M.Tuıaqbaevtyń bul eńbegi – jas dıplomatqa taptyrmas tájirıbe talqysy», dedi ol.
Tótenshe jáne ókiletti elshi, professor Ádil Ahmetov «jaratqannyń elshisi» degen maǵynany bildiretin avtordyń esim-soıy onyń rasynda da dıplomattyq bolmysyn aıshyqtap turǵanyn aıtyp, jyly lebizin bildirdi.
Respýblıkalyq «Tańsholpan» ádebı-kópshilik jýrnalynyń bas redaktory Nurlybek Safın mádenı dıplomatııanyń saıasattaǵy mańyzdy róli men onyń maqsat-muratyna toqtaldy. «Men Mursal-Nábı myrzanyń úndi halqynyń ádebı-mádenı qabatyna tereń úńilip, ondaǵy qazaq halqy týraly derekterdi arshyp alyp, ortaǵa salǵan eńbegin qatty baǵalaımyn. Sonyń biri úndi halyq jyrlarynda kezdesetin jyldamdyqty, ótkirlikti beıneleıtin «qazaqtyń jebesindeı» turaqty tirkesi. Bul degenińiz – ózge eldiń mádenıetin zerdeleı otyryp, óz elińniń rýhanııatyna olja salý», dedi ol.
Sonymen qatar is-sharaǵa arnaıy qonaqtar Úndistannyń Qazaqstandaǵy Tótenshe jáne ókiletti elshisi Nagendra Prasada, Indonezııa elshisi Mohamad Fadjrýl Rahman, Fransııa elshiliginiń mádenıet attashesi Klara Meısen qatysty. Olar M.Tuıaqbaevqa áriptestik iltıpatyn bildirip, memleketaralyq yntymaqtastyqtyń nyǵaıýyna tilektestigin jetkizdi. О́z kezeginde Úndistan elshisi N.Prasada bolashaqta Qazaqstan jáne onyń mádenıeti haqynda eńbek jazý oıynda bar ekenin jetkizdi.
Jıynnyń qorytyndy bóliminde kitaptyń tusaýy kesilip, avtor jınalǵandarǵa alǵys aıtty.