Memlekettik keńesshi Erlan Qarın Parlament Májilisindegi alty saıası partııanyń fraksııa jetekshilerimen kezdesý ótkizdi.
Is-sharaǵa «Amanat» partııasy fraksııasynyń jetekshisi Elnur Beısenbaev, «Aýyl» halyqtyq-demokratııalyq patrıottyq partııasy fraksııasynyń jetekshisi Serik Egizbaev, «Respublica» partııasy fraksııasynyń jetekshisi Aıdarbek Qojanazarov, «Aq jol» Qazaqstan demokratııalyq partııasy fraksııasynyń jetekshisi Azat Perýashev, Qazaqstan Halyq partııasy fraksııasynyń jetekshisi Magerram Magerramov, Jalpyulttyq sosıal-demokratııalyq partııasy fraksııasynyń jetekshisi Ashat Raqymjanov, sondaı-aq Prezıdenttiń Parlamenttegi ókildiginiń basshysy Ámirbek Ospanbekov qatysty.
Basqosýǵa qatysýshylar Ulttyq quryltaıdyń «Adal adam – Adal eńbek – Adal tabys» atty úshinshi otyrysynda Memleket basshysy bergen tapsyrmalar men bastamalardy tıimdi júzege asyrý joldary men tásilderi týraly pikir almasty.
Memlekettik keńesshi Prezıdenttiń kóptegen bastamasyn naqty oryndaý úshin zańnamalyq turǵydan qoldaý kórsetý jáne oǵan depýtattardyń belsendi atsalysýy qajet ekenin atap ótti. Eń aldymen, esirtkini óndirý, lýdomanııa, vandalızm, turmystyq zorlyq-zombylyq úshin jaýapkershilikti kúsheıtý, sondaı-aq memlekettik nagradalar, onomastıka, arheologııalyq qyzmet týraly jáne basqa da zańdarǵa túzetýler engizý qajet.
Jıynda onomastıka, esirtkige jáne vandalızmge qarsy kúres týraly zań jobalary Májilistiń qaraýynda, al turmystyq zorlyq-zombylyqqa qarsy kúres týraly zańdy Májilis qabyldap, qujattyń Senatqa jiberilgenine nazar aýdaryldy.
Bul rette vandalızm degenimiz eskertkishter men tabıǵı nysandardy ǵana emes, qoǵamdyq oryndardaǵy múlikti de búldirý ekenine basa mán berildi. Depýtattar vandalızm jáne basqa da turmystyq quqyq buzýshylyqtar úshin jazany qatańdatý qajettigi týraly aıtty. Sondaı-aq fraksııa jetekshileri Prezıdent usynǵan jalpyulttyq qundylyqtardy dáripteýge qatysty usynystaryn ortaǵa saldy.