Naýryznamanyń Ulttyq sport kúnine oraı elimizdiń ár óńirinde túrli is-shara kópshilikke usynyldy. Astana qalasyndaǵy «Arǵymaq» at sporty saýyqtyrý kesheninde Týrızm jáne sport mınıstrligi, Ulttyq sport túrleri qaýymdastyǵy, elorda ákimdiginiń qoldaýymen ulttyq oıyn túrleri – kókpar, aýdaryspaq, teńge ilý, qyz qýý jáne toǵyzqumalaq pen asyq atýdan arnaıy saıys ótti.
Týrızm jáne sport mınıstri Ermek Marjyqpaev otandastardy ulttyq sport kúnimen quttyqtap, tól ónerimizdiń órisin keńeıtip, nasıhatyn arttyrýǵa aıryqsha kóńil bólinip jatqanyn atap ótti.
«Memleket basshysy Qasym-Jomart Toqaevtyń bastamasymen jyl basy, áz Naýryz merekesi on kún boıy toılanady. Kún men tún teńelip, tirshilik ataýly oıanatyn kóktemgi Naýryznama eldik merekege aınaldy. Qyrkúıek aıynda Astanada Dúnıejúzilik kóshpeliler oıyndary ótedi. Álemniń ár qıyrynan osy aıtýly dodany tamashalaýǵa 100 myńnan asa týrıst arnaıy keledi dep senim artamyz. 100-den asa elden 400-ge jýyq qatysýshy kóshpeliler oıyndarynyń kórigin qyzdyrady. Búgingi ulttyq sport kúnine oraı uıymdastyrylǵan merekelik is-shara arqyly da biz eldigimizdi nasıhattaımyz. At ústindegi Alash uldarynyń aıbyny arta bersin», dedi E.Marjyqpaev.
Ulttyq sport túrleri qaýymdastyǵynyń prezıdenti Islambek Saljanov tól ónerimizdiń jalpyhalyqtyq sıpat alyp, buqaralyq sportqa aınalyp kele jatqanyn jetkizdi.
«Ulttyq sport túrleri qaýymdastyǵy – 10 federasııanyń basyn biriktiretin uıym. Tól ónerimizden sańlaqtarymyz byltyr halyqaralyq, álemdik dodalarǵa qatysyp, 95 medal oljalady. Elimiz úshin aıtýly alaman sanalatyn Dúnıejúzilik kóshpeliler oıyndaryn joǵary deńgeıde ótkerýge Ulttyq sport túrleri qaýymdastyǵy da bilek túrip kirisip otyr. Bul aıtýly is-shara ulttyq sportymyzdy damytýǵa tyń serpin bereri sózsiz», dedi I.Saljanov.
Is-shara barysynda kókpardan Astana qalasynyń komandasy men AQSh-tan kelgen kovboılar arasyndaǵy joldastyq kezdesý tartysqa toly boldy. Rýhty janıtyn kókpar oıynyna qatysyp kórmegen amerıkalyqtar da sheberligimen tánti etti. Qorǵanystaǵy shabandozdary bizdiń jigitterdi qaqpaılap, sheńberge mańaılatpady. Jekpe-jekte de edáýir taıtalasty. AQSh komandasynyń kapıtany ulttyq oıynymyzdyń eptilikke baýlıtynyn erekshe atap ótti. AQSh quramasyn bastap kelgen kovboı Ledd Haýell 2018 jyly Qyrǵyzstanda ótken Dúnıejúzilik kóshpeliler oıyndaryna da qatysypty. Kókpar sporty bilekti ǵana emes, júrekti jigitterdiń dodasy ekenin aıtty.
«Bizdiń komandadaǵy Keısı Fıld ta, Djeıson Motl da buryn-sońdy kókpar tartyp kórmegen. Biraq olar kánigi kókparshylardan qaımyqqan joq, qaıta qaısarlyq tanytty. Kúzde Dúnıejúzilik kóshpeliler oıyndaryna da qatysamyz», dedi kovboı L.Haýell.
Naýryznama aıasynda uıymdastyrylǵan is-shara barysynda ulttyq sport ardagerlerine de syı-qurmet kórsetildi. Kókpardan KSRO-nyń toǵyz dúrkin chempıony Ábilhan Daýylbaev, toǵyzqumalaqtan Qazaqstannyń eki dúrkin chempıony Meıramqul Noǵaıbaev, Qazaq KSR-ine eńbek sińirgen jattyqtyrýshysy Jumabek Meıramǵalıev, belgili sport jýrnalısi, jazýshy Nesip Júnisbaıuly, Qazaqstannyń eńbek sińirgen jattyqtyrýshysy Qulamhan Jaqypov, asyq atýdan ulttyq quramanyń bas bapkeri Jomart Sabyrjanov, atbegi Meırambek Shákenovke qomaqty syıaqy berildi.
Ulttyq sporttyń ardageri, áıgili shabandoz, 30 jyl kókpar tartqan Ábilhan Daýylbaev amerıkalyq kovboılardyń degdar óner tól sportymyzǵa ıkemi bar ekenin aıtty.
«Amerıkalyqtardyń atqa minisinen-aq taqymy myqty ekenin baǵamdadyq, kókpardy jerden ilip alýda, jekpe-jekte de ábjildik tanytty. Bul – tek sporttyq saıys emes, óner dárejesindegi oıyn túri. Ulttyq sportymyzdyń osylaı dáriptelgeni eldigimizdi asqaqtata túsedi», dedi ardager kókparshy.
Statıstıkalyq derek boıynsha ulttyq sport túrlerimen júıeli túrde shuǵyldanýshylar qatary 619,2 myń adamǵa jetti. Bul baǵytta 1 488 jattyqtyrýshy jumys isteıdi, onyń ishinde 928 bapker aýylda shákirt tárbıelep keledi. 12 sport klýby men ulttyq sport túrleri boıynsha 13 sport mektebi bar. Budan basqa qurama komandalardyń sportshylary ázirlik júrgizetin Ulttyq jáne At sporty ortalyǵy jumys isteıdi.