Ulyq mereke aıasynda el astanasynda alǵash ret «Naýryz bal» atty aýqymdy is-shara ótti. Bul kesh túrli elderdiń dıplomatııalyq korpýsyn, halyqaralyq uıym basshylary men sheteldik kompanııalar ókilderin jınap, ulttyq naqyshtarymyz bederlengen dýmanǵa ulasty. Klassıkalyq óner men ulttyq boıaý astasqan Naýryz toıy san túrli oıyn-saýyq pen kórmege toly boldy. Túrli ulttyń mádenıeti men óneri de ulttyq merekeniń mereıin asyrdy. Aǵylshyndar asyq atyp jarysty, elshiler bı bıledi.
Mádenıet jáne aqparat mınıstri Aıda Balaeva Naýryz meıramyn toılaýdyń jańa formatyna toqtalyp, Ulttyq quryltaıdyń úshinshi otyrysynda Memleket basshysy sóz etken negizgi tezısterdi atap ótti.
«Bıyldan bastap elimiz Naýryzdy jańa formatta atap ótip jatyrmyz. Naýryznamanyń arnaıy tujyrymdamasy ázirlenip, onyń aıasynda ár kúnniń óz ataýy belgilendi. Naýryznamanyń sońǵy kúni – 23 naýryz – Jańa jyldy jańa maqsatpen, jańa úmitpen qarsy alýdyń sımvoly. Bul kúni Qazaqstannyń barlyq óńirinde jalpyulttyq ekologııalyq aksııalar ótedi. Árıne, Naýryz meıramyn osyndaı aýqymda atap ótý ulttyq biregeıligimizdi nyǵaıtýǵa, qoǵamdy bir maqsatqa shoǵyrlandyrýǵa septigin tıgizedi», dedi Aıda Balaeva.
Sonymen qatar mınıstr mádenı murany nasıhattaý men ony álemdik arenada tanytý maqsatynda mınıstrlik tarapynan jasalǵan jobalarǵa toqtaldy. Sonyń ishinde is-shara barysynda tanystyrylymy ótken «Qazaq sulture» aqparattyq-tanymdyq portaly bar. Onlaın portal Memleket basshysynyń elimizdiń mádenı murasyn tanytý, ulttyq brendti, tarıh pen mádenıetti nasıhattaý tapsyrmasy aıasynda iske qosylyp otyr. «Qazaq sulture» elimizdiń kópqyrly mádenıeti men baı tarıhynyń aıryqsha belgisine aınalmaq.
Merekelik is-sharada elimizdegi tuńǵysh kópultty «Birlik» án-bı ansambli de ónerin kórsetti. Ujym kópultty birlik pen mádenıetaralyq dıalogtiń biregeı úlgisiniń belgisindeı. Eske salsaq, ansambl bıyl álem halyqtarynyń mádenı murasyn saqtaý jáne nasıhattaý, dástúrli mýzyka men bıdi dáripteý maqsatynda jasaqtaldy.
Sondaı-aq kesh qonaqtaryna jańada qurylǵan «Zhoshy» folklorlyq ansambli tanystyryldy. Ansambl músheleri jelbýaz, mes syrnaı, ýildek, tastaýyq sııaqty sırek kezdesetin mýzykalyq aspaptarda oınaıdy. Olardyń sheberligi men talanty qazirdiń ózinde kópke tanylǵan, jaqyn arada shyǵarmashylyq ujym Qytaıǵa gastroldik saparmen barmaq.
Dıplomatııalyq baldyń qurmetti qonaqtary da elimizdi Naýryz meıramymen quttyqtady. «Naýryz merekesimen shyn júrekten quttyqtaımyn! Barsha qazaqstandyqtarǵa zor densaýlyq, baqyt, jaqsylyq pen amandyq tileımin! Bul qýanysh pen jańarý kezeńi sizderdiń júrekterińizge jarqyn jáne jyly sezim uıalatsyn, al úılerińizge beıbitshilik pen amandyq ákelsin», dedi BUU-nyń Turaqty úılestirýshisi Mıkael Frıberg-Storı.
«Naýryz kóktemniń alǵashqy lebimen birge keldi. Kóktemgi kún men túnniń teńelý kúni ár otbasyna baqyt, qýanysh ákeletinine, jańa jylda jaqsy oqıǵalar bolatynyna senimdimin», dedi Germanııa Federatıvtik Respýblıkasynyń Qazaqstandaǵy Tótenshe jáne ókiletti elshisi Monıka Iversen óz quttyqtaýynda.
Al Ortalyq Azııa boıynsha sýbaımaqtyq úılestirýshi, Qazaqstan, Qyrǵyzstan, Túrikmenstan jáne О́zbekstandaǵy HKU mıssııasynyń basshysy Zeınal Gadjıev ulyq merekeniń adamnyń janyna, tánine, minezine de jańalyq syılaıtynyn atap ótti. «Bul meıram – adamdarǵa baqytty ómir súrýge, damýǵa, órkendeýge, dostyq, bereke men mahabbatqa úmit syılaıtyn kóktemgi jańarý merekesi. Naýryz – birlik pen turaqtylyq meıramyna aınalyp, úılerińizge baqyt ákelsin, oılaǵan dúnıeniń barlyǵy júzege assyn», dedi ol.
Naýryz balynyń aıasynda ulttyq óner túrlerinen sheberlik saǵattary da uıymdastyryldy. Máselen, kıiz basýdyń eki túrin de (qurǵaq jáne ylǵaldy ádis) baıqap, shebermen birge jasap kórdik. Aıta keteıik, aýqymdy is-sharany Mádenıet jáne aqparat mınıstrligi uıymdastyryp otyr.