Mańǵystaý oblysynda jalǵan sertıfıkat jasatyp, biliktiligin arttyrmaq bolǵan muǵalimderdiń isi áshkere boldy. Derekke qatysty qaladaǵy oqý-ádistemelik ortalyǵynyń basshylary túsinik berdi, dep habarlaıdy Egemen.kz.
Almaty arnasynyń habarlaýynsha, bilim salasyndaǵy keleńsizdikti Aqtaýdaǵy muǵalimderdiń biri jarııa etken. «Sertıfıkat alýǵa mektep basshylyǵy májbúrledi» degen ol ár qujattyń kemi 17 myń teńge turatynyn aıtty. Zańǵa qaıshy keletin mundaı áreketti aıtqany úshin azamattyń basy da daýǵa qalǵan.
«30 shaqty adam aldy. Mektep ákimshiligi alaıaqtarmen aınalysady dep, kerisinshe menimen aınalysyp ketti. Sapaly bilim, ádildik qaıda? Sanaly urpaq tárbıelemeımiz be? Mektep ákimshiliginiń qatysy bar dep oılaımyn. Jumystan shyǵyp qalamyn dep qoryqpaımyn. Zańsyz eshteńe istemedim. Azamattyq pozısııam», dedi ustaz Jańylsyn Barsaeva.
Istiń aq-qarasyn ajyratqan óńirdegi «Ádildik joly» qoǵamdyq birlestigi sertıfıkattardyń rasynda zańsyz jolmen alynǵanyn anyqtaǵan. Jaýapty oryn Astanadaǵy oqý-ádistemelik ortalyǵyna resmı hat joldap, tizimdegi 40-qa jýyq muǵalimniń biliktilik kýrsynan ótpegenin bildi.
«О́rleý-Education» ortalyǵynan kelip otyrǵan suranys hatqa jaýap berdi. Olar mundaı úlgide sertıfıkat shyǵarmaıtynyn jetkizgen. Sonymen qatar kórsetilgen merzimde, jeltoqsanda oqý kýrsy ótpegen», dedi «Ádildik joly» qoǵamdyq birlestiginiń Mańǵystaý oblystyq fılıaly dırektory Asqar Jaqsybaev.
Bul derekke qatysty qaladaǵy oqý-ádistemelik ortalyǵynyń basshylary túsinik berdi.
Muǵalimder úsh jyl saıyn biliktiligin arttyrýǵa mindetti jáne arnaıy kýrstan ótýge tıis» degen olar biliktilik sanatyna qaraı jalaqy tólenetinin aıtty. Al kýrstan ótpegen ustazdardyń aılyǵy az bolady.
«Mektep ákimshiligi jaǵdaıyna qaraıdy, aqyly óte me, joq pa, ózderi sheshedi. Bul kýrsty oqýǵa hat jiberilmedi. О́zderi izdep taýyp alǵan. Muǵalimniń aılyǵyna áser etedi. Kategorııa ala almaı qalsa, árqaısynyń belgilengen aqsha mólsheri tólenbeıdi», dedi oqý-ádistemelik ortalyǵynyń dırektory Kúlpan Mırova.
Telearna tilshisiniń habarlaýynsha, qazir atalǵan iske qatysy bar degen muǵalimderden jaýap alynyp, tergeý bastaldy. Oblystyq polısııa departamenti «Jalǵan qujattardy qoldan jasaý, daıyndaý nemese ótkizý faktisi boıynsha» qylmystyq isti tirkep úlgerdi. Zańǵa sáıkes, derek rastalǵan jaǵdaıda azamattardy 4 jylǵa bas bostandyǵynan aıyrý nemese iri kólemde aıyppul artý qarastyrylǵan.