Muqtaj otbasylarǵa qoldaý kórsetý maqsatynda Jambyl oblysynda óńirdiń burynǵy basshysy, marqum Berdibek Saparbaevtyń qoldaýymen «Asarlatyp úı salý» jobasy qolǵa alynǵan edi. Bul ıgi bastama áli de ómirsheń bolyp tur.
Birneshe jyl buryn bastalǵan joba aıasynda óńirdiń barlyq aýdanynda áleýmettik jaǵdaıy tómen otbasylar qonystanǵan úılerge kúrdeli jóndeý jumysy júrgizilip, keıbir otbasylarǵa jańa baspana tartý etildi. Bul iske mesenat azamattar, kásipkerler, aýyl turǵyndary judyryqtaı jumylyp júr.
«Asarlatyp úı salý jobasy» óńirde sátimen jalǵasyp jatqany shyn qýantady. Derekke sensek, birneshe jyl buryn bastalǵan joba aıasynda óńirimizdiń ár qıyrynda, alys aýyldarda turatyn ondaǵan otbasy baspanaly bolypty. Biriniń úıine kúrdeli jóndeý júrgizilse, endi biriniń baspanasyna aǵymdaǵy jóndeý júrgizilgen. Keıbir otbasyǵa jańadan úı salynyp berilse, taǵy bir otbasylarǵa sol eldi mekenderden kásipker azamattar úı satyp áperipti. Mundaı qamqorlyqty sezingenderdiń atqaminer azamattarǵa aıtar alǵysy sheksiz.
Baıandy bastama aıasynda keıingi jyldary aýdandarda qandaı jumys atqarylyp jatyr? Osy saýalǵa jaýap izdep, birneshe aýdannyń ishki saıasat bólimderine habarlasqan edik.
«Jýaly aýdany boıynsha jýyq arada 10 turǵyn úı paıdalanýǵa berildi. Myńbulaq jáne Shaqpaq aýyldyq okrýgterindegi turatyn eki otbasyǵa arnalyp jańa baspana salynsa, bes otbasy qonystanǵan úılerge kúrdeli jóndeý júrgizildi. Sondaı-aq Boraldaı, Bılikól, Qoshqarata aýyldyq okrýg turǵyndaryna demeýshiler úsh baspana satyp ápergen edi», deıdi Jýaly aýdany ákimdigi ishki saıasat bóliminiń basshysy Nurqanat Baltabaev.
Jergilikti bılik keltirgen derekke sensek, Bılikól aýyldyq okrýgine qarasty Ábdiqadir, Qoshqarata aýyldarynan, Rysbek batyr eldi mekeninen úsh turǵyn úı satyp alynyp, muqtaj otbasylarǵa berilipti. Sondaı-aq birqatar turǵynnyń úıine tıisti jóndeý jumystary júrgizilip, der kezinde tabystalǵan.
Al qala irgesindegi Jambyl aýdanynda da «Asarlatyp úı salý» jobasy sheńberinde birneshe jyl boıy jalǵasyp keledi. Aýdannyń atqaminerleri aldyńǵy jyldy bylaı qoıǵanda, osy jyldyń ózinde birneshe otbasyny qýanyshqa keneltýdi josparlap otyr.
«Ashybulaq aýylynda Meıirhan Imanqulov turatyn úıdiń qurylysyn qalpyna keltirý isi bastalyp ketti. Qazirgi kezde úıdiń ishki sylaǵy men edenine beton tóseý jumysy júrgizilip jatyr. Al Tastóbe aýlynda turatyn Saǵynbek Qypshaqbaevtyń úıine elektr júıesi júrgizildi. Edenin qalpyna keltirý, ishki árleý jáne syrtqy sylaq jumysy qaldy. Esik-tereze ornatýǵa tapsyrys berildi. Sondaı-aq Qyzyldıhan aýlynyń turǵyny Farýh Mashanlonyń turǵyn úıinde de sharýa josparǵa saı atqarylyp jatyr. Qazirgi kezde úıdiń qabyrǵasy qalanǵan. Aýa raıynyń qolaısyzdyǵyna baılanysty qalǵan jumys ázirge toqtap tur», deıdi Jambyl aýdandyq ishki saıasat bóliminiń basshysy Baqytjan Qutjan.
Jalpy alǵanda atalǵan joba aıasynda óńirimizdiń barlyq aýdanynda birneshe jyl boıy áleýmettik turǵydan az qamtylǵan otbasylardyń baspanasyna jóndeý jumystaryn júrgizý, úıi joqtarǵa jańa úı salý nemese satyp áperýge myqtap den qoıylǵan. Burynǵydan qalǵan asar dástúri birneshe jyldan beri Jambyl oblysynda sátimen iske asyrylyp jatyr. Osy oraıda muqtaj otbasylarǵa qoldan kelgen kómegin kórsetip jatqan demeýshilerge de alǵys aıta ketken jón.
Qalaı desek te, baıyrǵy dástúrge sáıkes jalǵasyp jatqan «Asarlatyp úı salý jobasy» el ishindegi birlikti, azamattardyń iskerligin taǵy da bir aıqyndap berdi. Jobanyń basty maqsaty da osy edi. О́tken jyldyń sońynda Jýaly aýdanynda 10 otbasynyń qonys toıyn toılaýy – sózimizge dálel.
Jambyl oblysy