Naýryz merekesi – aǵaıyndy ǵana emes, qalyń jurtty yntymaqqa shaqyratyn keremet meıram. Osyndaıda esime aýyldaǵy nemis kórshilerdiń qazaqy dástúrmen jaıatyn dastarqany túsedi. Kezinde dalamyzǵa qonys aýdarǵan júzdegen etnostyń ishinde nemis jurtynyń qazaq halqyna degen yqylasy ystyq, mahabbaty mazmundy kórinedi.
Keńes ókimeti kezinde qazaq jerinde nemis etnosynyń ókilderi kóp edi. Keńes odaǵy ydyraǵan jyldary birazy atajurtyna oralypty. Sóıtsem Germanııada da «qazaq» dep soqqan júrekter lúpildep turady eken... Ony biz elimizge joldanǵan tolassyz saǵynyshty hattardan kórip, bilip júrmiz. Qazaq dástúrin qurmettep, Naýryz merekesin toılaıtyn nemis otbasylaryn estigende, kóńilimiz kókke kóteriledi. Sondaı otbasylardyń biri – Delbrıýk áýleti.
Olar Qostanaı oblysy Túıemoınaq aýylynda týyp-ósken. Qazir Keln qalasynda turady. Atajurtyna kóshkenine 21 jyldan assa da, qazaqtyń ádet-ǵurpyna adal. Dombyramen án aıtady, soǵym soıady. Aıtýlarynsha, Germanııada jylqy etin tabý óte qıyn. Alaıda qazaqtyń qazysynan keıin nemistiń kotletine keıipkerlerimizdiń tábeti tarta qoımaǵan sekildi. Al otaǵasy Karl aqsaqal kádimgi tobylǵy sapty, buzaý tis qamshy óredi. «Aýylda týdyq, óstik. Aqsaqaldardyń shapanynyń shalǵaıynda júrip óner úırendik. Sonyń biri osy – qamshy órý. Eski jıhazdardy buzyp, bylǵarysyn qamshyǵa paıdalanamyn. Babadan kele jatqan mura bolǵan soń, ózime qatty ystyq. Árbir qamshymdaǵy oıý-órnek, naqysh bederler qazaqtyń dalasyndaǵy baraqatty kezderimdi eske túsiredi», deıdi ol. Maıqy bıdiń aýzynan túskendeı maqaldatyp sóıleıtin Karl aqsaqal qazir 12 nemere, 7 shóbere tárbıelep otyr. Balalarynyń deni qazaqsha sóıleıdi. Buǵan qosa, nemis áýleti dastarqanǵa bata jasap, arýaqtarǵa quran baǵyshtaıdy.
– Qazaqstanǵa sońǵy ret 2018 jyly bardyq. Pandemııanyń kesirinen keıin barýǵa jolymyz túspedi. El dese júregimiz atqaqtap turady. Munda da qazaqy dástúrimizdi umytpaı beısenbi saıyn shelpek pisirip, merekede naýryzkóje qaınatamyz. Nemereler dán rıza. Munda jalǵyz emespiz. Qazaqstannan birge kóship kelgen aǵaıyn-týystarymyz da alys emes. Bir-birimizdi jıi qonaqqa shaqyramyz. Sodan keıin Germanııada turatyn qazaqtardyń quryltaıy ótip turady. Sonda jerlesterimizdi kórip, maýqymyz basylady. Kóńilge jubanysh bolatyn, saǵynyshymyzdy basatyn osyndaı basqosýlar, – deıdi otanasy.
Osy oraıda aqyn Qadyr Myrza Áliniń «Týǵan jerden qanshalyqty alystasań, janyńmen sonshalyqty jaqyndaı túsesiń» degen aforızmi oıǵa oralady. Ras, týǵan jerdiń taýy da, tasy da – altyn. Sebebi onda balalyq shaǵyńnyń elesi, jastyq shaǵyńnyń sáýlesi qalǵan. Adamdy magnıtshe tartyp turatyn da osy qubylys. «Aýyldan adam kóshse de, adamnan aýyl kóshpeıdi» degen osy bolsa kerek.