Aqtaý qalasynda jergilikti turǵyn qalalyq polısııa basqarmasy qyzmetkerleri soqqyǵa jyqqanyn aıtty, ony urlyq jasaǵanyn moıyndaýǵa májbúrlegen, dep habarlaıdy Egemen.kz.
«Lada» basylymy jazǵandaı, jábirlenýshi 22 naýryzda jumysqa barar kezde kóligin otaldyra almaǵan. Másele generatordyń isten shyǵyp, aýystyrýdy qajet etetindiginde bolǵan.
Er adam 20 jyldan beri biletin dosy Vıktorǵa júginýdi jón kórdi. Onyń 21-shaǵynaýdandaǵy óndiristik bazasynda generatorlar bolǵan. Ashyq turǵan bazaǵa kelgen ol avtoelektrıkten tekserip, durysyn tańdaý úshin tórt qurylǵyny alyp ketedi. Vıktormen habarlasa almaǵandyqtan, oǵan eskertý múmkin bolmaıdy. Kóp uzamaı Vıktordyń aǵasy bazaǵa kelip, generatorlardyń joǵalǵanyn bilip, polısııaǵa habarlaǵan.
Osy ýaqytta er adam kóligin jóndep, qalǵan generatorlardy júksalǵyshqa salyp, úıine qaraı bet alady. Bir saǵattan keıin jumysqa kele jatqanda ony jol polısııasy toqtatyp, onyń qylmys jasaǵany týraly qońyraý túskenin aıtady. Olar polısııa basqarmasyna barýdy usynǵan.
Er adamdy polısııa qyzmetkeri Baýyrjan kútip alyp, kólikti basqarma aýmaǵyna ákelýdi talap etken. Kúdikti Vıktorǵa telefon soǵyp, mán-jaıdy túsindirmek bolǵan, biraq Baýyrjan onyń jeńinen ustap, ǵımarattyń ishine, úshinshi qabattaǵy keńsege súırep aparyp, telefondy tartyp alǵan.
Er adamnyń aıtýynsha, sol kezde taǵy eki tártip saqshysy kelip, balaǵat sózder aıtyp, generatorlardy urlaǵanyn moıyndaýdy talap etken. Er adamdy tyńdamastan, úsh polıseı onyń betinen, denesinen jáne aıaǵynan uryp-soǵa bastaǵan.
Er adam prokýratýraǵa shaǵym túsiretinin aıtqan. Bul polıseılerdi odan saıyn ashýlandyryp, ony qattyraq ura bastaǵan. Kóp uzamaı olarǵa urlyq rastalmaǵany týraly qońyraý kelip, Vıktor aryz jazýdan bas tartqan.
Sodan keıin Baýyrjan jábirlenýshiden keshirim surap, prokýratýraǵa shaǵymdanbaýdy ótinedi. Alaıda jábirlenýshi polısııa bólimshesi ǵımaratynan shyǵa sala, qadaǵalaý organyna dereý aryzdanǵan.
Oblystyq kópsalaly aýrýhanada oǵan keýde, bas jáne bet aımaǵyndaǵy jumsaq tinderdiń kógerýi, sonymen qatar jabyq bassúıek-mı jaraqaty jáne mı shaıqalý dıagnozy qoıylǵan.
Lada.kz resmı pikir alý úshin Mańǵystaý oblysy PD baspasóz qyzmetine júgingen. Vedomstvoda atalǵan fakt boıynsha prokýratýrada qylmystyq is qozǵalǵanyn habarlady.
«Mán-jaı anyqtalyp jatyr. Tergeý múddesi úshin basqa málimet jarııalanbaıdy», dep jaýap berdi oblystyq polısııa departamenti ókilderi.