Memleket basshysy Qasym-Jomart Toqaev QHR Shyńjań-Uıǵyr avtonomııalyq aýdany QKP partııa komıteti hatshysynyń orynbasary, ShUAA Halyq úkimetiniń tóraǵasy Erkın Týnııazdy qabyldady, dep habarlaıdy Egemen.kz Aqorda baspasóz qyzmetine silteme jasap.
«Men jýyrda Úrimjige bardym. Jalpy Qazaqstannyń Qytaımen, sonyń ishinde Shyńjań provınsııasymen aradaǵy yntymaqtastyǵyn damytý perspektıvalaryna baılanysty mańyzdy kelissózder júrgizdik. Biz Qytaıdyń ekonomıkalyq ósimin jiti baqylap otyrmyz jáne bul baǵyttaǵy qarqyndy damýy men qol jetkizgen nátıjelerine basa mán beremiz. Qytaı – ekonomıkalyq damý turǵysynan álemdegi basty elderdiń biri. Sondyqtan biz sııaqty kórshi memleketke yntymaqtastyqty ilgeriletý tıimdi ári qajet. Qazaqstanǵa keler bolsaq, osy yqpaldastyqty tabysty damytý úshin qoldan kelgenniń bárin jasaımyz», dedi Prezıdent.
Memleket basshysy elimizdiń Shyńjańmen saýda, ónerkásip, kólik, logıstıka, aýyl sharýashylyǵy jáne týrızm sııaqty kóptegen sala boıynsha tabysty qarym-qatynas ornatqanyn atap ótti. Qasym-Jomart Toqaevtyń aıtýynsha, bul ólke Qazaqstannyń QHR-men san qyrly baılanysyn nyǵaıtýda strategııalyq ról atqarady.
О́z kezeginde Erkın Týnııaz qonaqjaılyq tanytqany úshin Qasym-Jomart Toqaevqa alǵys aıtty.
- «Úsh zulym kúshke» qarsy kúreske jáne osy aımaqtaǵy turaqtylyqty saqtaýǵa qosqan úlesińiz úshin Sizge alǵys aıtqym keledi. Qytaı men Qazaqstan arasyndaǵy dostyqtyń tarıhy tereńde jatyr. Tóraǵa Sı Szınpınniń strategııalyq basshylyǵymen jáne Sizdiń qoldaýyńyzben «Bir beldeý, bir jol» bastamasy men «Nurly jol» ekonomıkalyq damý baǵdarlamasy sátti ushtastyryldy. Eki el máńgilik ári jan-jaqty strategııalyq seriktestik ornatty. О́tken jyly naýryz aıynda Shyńjań-Uıǵyr avtonomııalyq aýdany QKP partııa komıtetiniń hatshysy Ma Sınjýı bastaǵan delegasııa Qazaqstanǵa kelip, óte mańyzdy kelisimderge qol jetkizgenin erekshe atap ótken jón. Byltyr qazan aıynda Siz Shyńjań-Uıǵyr avtonomııalyq aýdanyna saparmen keldińiz. Bul ózara yntymaqtastyǵymyzdy odan ári damytýǵa tyń serpin berdi, – dedi ShUAA Halyq úkimetiniń tóraǵasy.
Kezdesý sońynda Qasym-Jomart Toqaev Shyńjań Halyq úkimeti tóraǵasynyń Qazaqstanǵa sapary óńiraralyq kooperasııa men shekara mańyndaǵy oblystardyń ózara yntymaqtastyǵyn odan ári damytýǵa yqpal etetinine senim bildirdi.