Jetisýda sý tasqynyna qarsy jumystar kúsheıtildi. Sebebi kúni keshe aýa temperatýrasynyń kúrt kóterilýi jáne qardyń qarqyndy erýi saldarynan 12 sý basý faktisi tirkeldi. Qazir sý basý qaýpi bar 31 eldi mekende arnaıy sharalar júrgizilip jatyr. Byltyrǵy jaǵdaı qaıtalanbas úshin barlyq tehnıka túri jumyldyrylǵan.
Alakól aýdanynyń Qabanbaı, Aqtúbek, Beskól stansasy, Kóktuma aýyldary jáne Kerbulaq aýdany Qaınarly aýyly boıynsha 30 jeke turǵyn úı aýlasyn sý basty. Abyroı bolǵanda turǵyn úılerdiń ishine sý kirmegen. Buǵan qosa eki avtojoldyń ústinen erigen qar sýy ótti. Atap aıtsaq, bul – Kerbulaq aýdanynyń Jolaman aýyly men Jolaman stansasy jáne Malaısary aýyly men Malaısary stansasy jergilikti mańyzy bar avtojoldar. Sondaı-aq Aqsý aýdanyna qarasty Qopa aýylynda sý burý kanalynda sý deńgeıi kóterildi. Oblystyq TJD tótenshe jaǵdaılardyń aldyn alý basqarmasynyń bastyǵy Rınat Tazabekov aıtýynsha, turǵyndardyń barynsha saqtanyp júrgeni abzal.
«Búginde Eskeldi aýdanynyń Abaı jáne Eshkiólmes aýyldary boıynsha tıisti jumystar bastaldy. Sondaı-aq Panfılov aýdanynyń Kóktal-Arasan aýyly jáne Tekeli qalasy boıynsha konkýrstyq rásimder júrgizilip jatyr. Al Kerbulaq aýdanynyń Malaısary jáne Panfılov aýdanynyń Qońyróleń aýyldary boıynsha jobalyq-smetalyq qujattar ázirlenip jatyr. Qaratal aýdany Úshtóbe qalasy jáne Kerbulaq aýdanynyń Arharly aýyldary boıynsha sý tasqynyna qarsy jumystar demeýshilik qarajat esebinen júrgiziledi», deıdi R.Tazabekov.
Onyń aıtýynsha, oqys oqıǵalar kezinde departament mamandary jedel túrde qutqarý jumystaryn júrgizýge daıyn. Zardap shekkender joq, ǵımarattar da bútin. Departament jáne jergilikti atqarýshy organdarmen birlese sý tasqynyna beıim eldi mekenderdi erekshe baqylaýǵa aldy.
«Jalpy, sý tasqyny jaǵdaıynyń kúrdelenýi kezeńine 95 tonna janar-jaǵarmaı qory, 2,6 myń tonna ınertti materıaldar, 49 myń qap daıyndaldy. Buǵan qosa 1 056 jeke quram, 264 tehnıka birligi, 141 motopompalar, 165 qorǵanys kıimderi jáne 7 júzý quraldary bar. Zardap shekken halyqty ýaqytsha ornalastyrý maqsatynda bilim berý jáne Mádenıet úıleri ǵımarattarynda 175 pýnkt bekitildi», deıdi R.Tazabekov.
Búginde sý tasqyny jaǵdaıyn baqylaý úshin oblys boıynsha 57 gıdropost qoıylǵan. Mamandar sý tasqyny qaýpi bar eki eldi mekende 1,2 km sý burý arnasyna jóndeý jáne 4,6 km ózen arnalaryna mehanıkalyq tazartý jumystaryn júrgizip jatyr. Sonymen qatar sý tasqynyna qarsy is-sharalar aılyǵy aıasynda 92 km aryq jelileri, 66 km kanaldar jáne 1 728 sý ótkizgish qubyrystary qar men muzdan tazartylǵan. Sý basý qaýpi bar eldi mekenderden 17 myń tekshe metrden asa qar shyǵarylǵan.
Sý tasqyny jaǵdaıy kúrdelengen jaǵdaıda 141 birlik sý sorǵysh motopompalar men 264 birlik tehnıka ázir tur.
Jetisý oblysy