Kóktemgi qarbalas

Kóktemniń habarshysyndaı oqys oqıǵa oblys ortalyǵyn­da boldy. Ádette qalanyń qa­ry erte erıdi. Júrginshiniń kóp­tiginen be, jylý júıesiniń áse­ri me, áıteýir qasat qardyń kó­besi tez sógiledi. Bul joly da solaı boldy. Yryq bermes qyzyl sý oblys ortalyǵynda­ǵy №22 mektepke lap berdi. Áp-sátte ǵımarattyń jertólesin sý basyp qaldy. Birlik shaǵyn aýda­nyndaǵy jańa salynǵan mektep­te 360 oqýshy oqyp, bilim ala­tyn. Bir jaqsysy, qyzyl asyq­tan keletin qyzyl sý qaptaǵanda oqýshylar demalysta júr edi. Ba­la­larǵa tamaq ázirleıtin asúı, kir jýý bólmesindegi arnaıy jab­dyqtar, birneshe tońazytqysh, as saqtaıtyn qoıma, túgel sý as­tynda qaldy. Arnaıy qyzmet kúni-túni kirpik ilmeı, jertóleni sýdan tazartty. Jyraǵa qum sa­lynǵan qaptar úıildi.

– Bıyl qar kóp tústi ǵoı. Sýdy sorǵytyp, qazir qalpyna keltirý jumystary júrgizilip jatyr, – deıdi mektep dırektory Manargúl Toqan.

Zerendi aýdanynda sý basý qaýpi tónip turǵan Shaǵalaly, Troısk, Aıdabol, Alekseevka, Ivanovka aýyldary qyzyl sýdan qorǵanýǵa qareket etip jatyr. Bul aýyldardy Shaǵalaly, Qylshaqty ózenderi jıekteı janap ótedi.

– Rezervten 22,8 mln teńge bólindi. Aýdan aýmaǵynda tórt gıd­rotehnıkalyq ǵımarat bar. Mamandardyń saraptaýy­na qaraǵanda, Aıdabol, Alek­seevka, Ivanovka, Podlesnyı bógetteriniń jaǵdaıy qanaǵat­tanarlyq, – deıdi Zerendi aýdany ákiminiń orynbasary Ashat Ahmedıanov.

Aýdanda sý tasqynynyń al­dyn alýǵa baǵyttalǵan is-shara­lar aqpan aıynyń alǵashqy kún­deri bastalǵan eken. Kúni bú­ginge deıin aýdannyń eldi meken­derinen 10 myń tekshe metr qar shyǵarylypty. Jalpy uzyn­dyǵy 4,8 shaqyrym 18 arna, 10 aryq, avtokólik joldarynyń 85 je­rindegi sý ótkizý qubyrlary tazalanǵan. 1400 dana qapshyq, 1 000 tonna ınertti materıal, 20 myń lıtr dızel otyny jı­naqtalǵan. Tótenshe jaǵdaı­­lar týyndaı qalsa, adamdardy ta­maq­tandyrý máselesi sheshilgen. 22 ýaqytsha panalatý pýnktteri daıyndalǵan.

Jyl saıyn tasqyn sýdyń zardabyn tartatyn Selınograd aýdanynda da tyńǵylyqty da­ıyndyq júrgizilgenge uqsaıdy. Aýdandaǵy Qoıandy, Shubar, Araı­ly, Nuresil, О́temis, So­fıevka tárizdi eldi mekenderden qar shyǵarylyp, sý ótkizetin qu­byrlar tazartylyp jatyr.

– Injenerlik qorǵaý josparynan tys aýyl turǵyndarynyń ótinishterin zerdeleı zerttep, 92 sý ótkizgish qondyrǵy ornatyldy, – deıdi aýdan ákiminiń orynbasary Serik Ospanov.

О́ńir aýdandarynda daıyn­dyq jumystary shıratylyp, jergilikti atqarýshy organdar­dyń barlyq deńgeıinde shtab qurylyp, daıyndyq jumys­tary pysyqtaldy. Kommýnal­dyq qyzmet kúsheıtilgen rejimde ju­mys istep jatyr. Joǵaryda aıtylǵan aqparattardyń aý-ja­ıy­na qaraǵanda, synaqqa tótep berýge tıispiz.

Aqmola oblysy