Naýryznama onkúndigi aıasynda Batys Qazaqstan oblysynda aǵash otyrǵyzý aksııasy ótti.
Oral qalasynyń jańa bóligi – 10-shaǵyn aýdanynda 74 túp shyrsha kósheti otyrǵyzyldy. Aksııaǵa óńir basshysy Narıman Tóreǵalıev, ardagerler, kásipkerler, jastar, qarapaıym qala turǵyndary qatysty.
Memleket basshysynyń bastamasymen bıyl elimizde erekshe toılanyp jatqan Naýryznamanyń ár kúni ulttyq qundylyqty nasıhattaýǵa baǵyttalǵan. Jańarý kúninde Jaıyq jaǵasyndaǵy jasyl qalanyń kósheleri jas kóshettermen tolyqty.
– «Júz jyldyǵyn oılaǵan halyq aǵash egedi» deıdi halqymyz. Biz bul kóshetterdi qalanyń tazalyǵy, kórki úshin otyrǵyzyp jatyrmyz, sonymen birge bul jelek bolashaq urpaǵymyzdyń da ıgiligine qyzmet etedi. Oblys ortalyǵyn túbegeıli jańartýǵa qatysty keshendi jumys byltyr bastalǵan: joldar salynyp, tynymbaqtar jóndelip, jańa oramdar ashyldy. Bul jumys bıyl da jalǵasady, – dedi oblys ákimi Narıman Tóreǵalıev.
Oblys ákiminiń baspasóz qyzmeti habarlaǵanyndaı, ótken jyly Oral qalasynda 4 myńǵa jýyq kóshet otyrǵyzylǵan eken. Bıyl bul jumys jalǵasyp, Oral qalasyn kóriktendirý maqsatynda 3 myńdaı aǵash otyrǵyzý kózdelgen.
Oral elimizdegi jasyl jelegi mol qalalardyń biri sanalady. Biraq jergilikti ekologter, tabıǵat janashyrlary ózender boıyndaǵy orman qoryn molaıtý, bar ormandy qorǵaý jáne aǵash egý jumysyn kóbeıtý jóninde jıi bastama kóterip keledi. Sonymen birge jańadan otyrǵyzylǵan kóshetterdi kútip-baptaý, ósip ketýin qadaǵalaý eń basty másele eken.
– Prezıdent bastamasymen elimizde 2 mlrd túp aǵash egý jóninde úlken joba qolǵa alynǵan edi. Bul tapsyrma boıynsha bizdiń oblysta 56 mln túp aǵash egilýge tıis. Qazirgi tańda bizdiń óńirdegi tıisti memlekettik organdar 22 mln túp aǵash egilgeni jóninde esep berip jatyr. Bizdiń qoǵamdyq birlestiktiń usynysymen quramynda qoǵam belsendileri, jergilikti ekologııa departamenti mamandary bar arnaıy komıssııa qurylyp, egilgen aǵashtarǵa sanaq júrgizýdi qolǵa alatyn boldyq. Bizdiń bul isimizge Mahambet О́temisuly atyndaǵy ýnıversıtettiń stýdentteri kómektesýge daıyn, – deıdi «Telegeı» ekologııalyq qoǵamdyq birlestiginiń jetekshisi Dáýrenbek Sahym.
Qoǵam belsendisiniń aıtýynsha, qazir oblys ortalyǵyndaǵy terekterdi ınventarızasııalaý isin Mahambet О́temisuly atyndaǵy Batys Qazaqstan ýnıversıteti jasap jatyr. Iаǵnı ár terek esepke alynyp, jeke qujaty jasalmaq.
Batys Qazaqstan oblysy