Naýryznamanyń Jańarý kúninde oblys ortalyǵy Taraz qalasy men óńirdiń birqatar aýdanynda «Jasyl jelek – jerdiń kórki» aksııasy uıymdastyrylyp, kóshetter otyrǵyzyldy.
Taraz qalasyndaǵy Qaırat Rysqulbekov atyndaǵy ortalyq saıabaqqa óńir basshysy Erbol Qarashókeev, qala ákimi Baqytjan Orynbekov bastap, zııaly qaýym ókilderi qoshtap, 605 túp kóshet otyrǵyzdy. Taraz qalasynyń ákimi B.Orynbekovtiń aıtýynsha, oblys ortalyǵyn kógaldandyrý jumystary úzdiksiz júrgizile bermek.
Derekke súıensek, osy jyly Taraz qalasynda 1 mln-nan asa gúl, onyń ishinde 15 myń dana raýshan gúlin egý josparlanǵan. «Jasyl beldeý» baǵdarlamasy aıasynda 20 myń, «Uly dala» shaǵyn aýdanynda salynatyn saıabaqta 3 500, jalpy alǵanda 40 myń túp tal-daraq egiledi eken.
«Memleket basshysynyń tapsyrmasyna sáıkes, óńirdegi orman qoryn molyqtyrý jáne molaıtý jónindegi keshendi jospar aıasynda 16 540 gektar aýmaqqa 34,5 mln túp tal-daraq otyrǵyzý josparlanǵan. Bul jumys sátimen júzege asyrylady.
Buǵan qosa eldi mekenderdi kógaldandyrý, jasyl aımaq qurý máselesi de nazardan tys qalmaq emes. Máselen, óńirdegi aýyldarda 170,3 gektar aýmaqqa 200 myń túrli aǵash kósheti otyrǵyzylady», deıdi óńir basshysy E.Qarashókeev.
TARAZ