Ońtústik Koreıada jasandy ıntellekt arqyly jasalǵan telejúrgizýshi jańalyqtar baǵdarlamasyn júrgizedi.
Telejúrgizýshi qyz Chedjýdo aralynyń saıasaty men tynys-tirshiligi týraly aqparatty oqyp beredi. Onyń mátinin de daıyndap beretin – jasandy ıntellekt. Jalaqy suramaıtyn, aýyryp qalmaıtyn, daýysy, máneri buzylmaıtyn, boıanbaıtyn júrgizýshi qaı jaǵynan alyp qarasańyz da tıimdi deıdi mamandar. Baǵdarlamaǵa aıyna 600 000 von jumsalady eken. Bul – shyn júrgizýshiler men redaktorlar komandasyn jaldaǵannan áldeqaıda arzan.
Búgingi tańda elimizde de telestýdııalyq habarlardy jasandy ıntellekt júrgizetin júıeler iske qosyldy. Atap aıtsaq, «Túrkistan» telearnasynda Kúnshýaq Tabıǵatqyzy esimdi robot qyz kún raıynan habardar etedi. Tap solaı «Qyzylorda» telearnasyndaǵy aýa raıyn Aıjan Syrqyzy esimdi jasandy júrgizýshi baıandap otyrady.
Oı kúshimen oınady
Ilon Masktiń «Neuralink» kompanııasy mıyna ımplant ornatylǵan pasıenttiń shahmat oınaǵanyn jarııa etti.
Jazataıym oqıǵanyń sebebinen Nolan Arbo esimdi jigit denesiniń ıyǵynan tómen jaǵyn múlde sezbeıdi. Biraq mıyna ornatylǵan ımplant oı kúshi arqyly tintýirdi qozǵaltyp, kompıýterdi ıgere alatyn jaǵdaıǵa jetti. Oıyn barysy tikeleı translıasııa arqyly 20 naýryzda «Neuralink»-te kórsetildi.
Arbonyń aıtýynsha, sal aýrýynyń kesirinen súıikti kompıýter oıyndarynan bas tartqanyna kóp bolypty. Al jańa qondyrǵy jańa múmkindikterge jol ashyp otyr. «Bul meniń ómirimdi túbegeıli ózgertti. Operasııa óte jeńil ótti», deıdi ol.
«Neuralink» – kompıýterge qosylatyn mı chıpterimen jumys isteıtin álemdegi jalǵyz kompanııa. Oı kúshi arqyly yqpal etetin tájirıbe jumystary ilgeride jasalǵan eken. Bul – zerttteý ınstıtýttarynyń konsorsıýmy men Brain Gate emhanasynyń birlesken jobasy.
Áleýmettik jelige tyıym saldy
Áleýmettik jelige shekteý qoıylady. Jo-joq, bizdiń elde emes. AQSh-tyń Florıda shtatynyń gýbernatory Ron De Santıs engizgen zań – bul.
Florıda shtatynyń gýbernatory Ron De Santıs 2024 jyldyń 25 naýryzynda 14 jasqa tolmaǵan balalardyń áleýmettik jelidegi paraqshalaryna tyıym salynatyny týraly zańǵa qol qoıdy. Tarqatyp aıtsaq, zań 2025 jyldyń birinshi qańtarynan bastap kúshine enedi. Eger 14 jasqa deıingi balalardyń áleýmettik jelide paraqshalary bar bolyp shyqsa, onda onyń ata-anasy 50 myń dollar aıyppul arqalamaq. Bunyń bári ne úshin deısiz ǵoı? Sebep bireý-aq. Shtat gýbernatory óz málimdemesinde áleýmettik medıa balalarǵa zııan tıgizetinin, jańa zań ata-analarǵa balalaryn josyqsyz aqparattan qorǵaýǵa kóbirek múmkindik beretinin atap ótti.
Daıyndaǵan –
Bekzat Qulshar,
L.N.Gýmılev atyndaǵy EUÝ stýdenti