AQSh-tyń Maıamı qalasynda ótip jatqan «Masters» týrnırinde Qazaqstannyń tennısshileri – Iýlııa Pýtınseva men Elena Rybakına tabysty óner kórsetip, shırek fınalǵa shyqty.
Júlde qory 8 995 555 dollardy quraǵan jarystyń alǵashqy aınalymynda Iýlııa Pýtınseva (álemdik reıtıngte 68-oryn) ıspanııalyq Krıstına Býchýdan (№74) basym tústi – 6:2, 3:6, 6:4. Kóp keshikpeı WTA tiziminde ózinen áldeqaıda joǵary turǵan reseılik Lıýdmıla Samsonovaǵa (№15) san soqtyrdy – 6:1, 4:6, 6:3. Odan keıin belgııalyq Gret Mınnendi (№79) utty – 6:2, 2:6, 6:4. Tórtinshi kezeńde Pýtınseva ýkraınalyq Angelına Kalınınany (№36) qapy qaldyrdy – 6:4, 7:6.
Alǵashqy aınalymda bos bolǵan Elena Rybakına (№4) ekinshi kezeńde danııalyq Klara Taýsonnan (№91) 3:6 esebimen utylyp jatqanyna qaramastan, ekinshi jáne úshinshi setterdi óz paıdasyna sheshti – 7:5, 6:4. Odan keıin ol amerıkalyq Teılor Taýnsendi (№72) tize búktirdi – 6:3, 6:7, 6:4. 1/8 fınalda Medıson Kızden (№18) aılasyn asyrdy – 6:3, 7:5.
О́kinishke qaraı, elimizdiń erler quramasynyń músheleri aıshyqty ónerimen kórermenderin qýanta almady. Atap aıtsaq, Aleksandr Shevchenko (№58) kolýmbııalyq Danıel-Elıan Galandy (№84) qapy qaldyrǵanymen, ile-shala polshalyq Hýbert Hýrkachqa (№9) jol berdi. Al Aleksandr Býblık (№18) ıtalııalyq Matteo Arnaldıdiń (№38) osal tusyn taba almady.