Semeı qalasyndaǵy №3 arnaıy mektep-ınternaty erekshe balalardy oqytady. Taǵdyrdyń synaǵyna synbaǵan oqýshylar bilimmen qatar ulttyq ónerdi qatar alyp júr. Ulttyq aspaptardy meńgergen mektep oqýshylarynan «Sulý saz» folklorlyq ansambli men «Syrǵalym» jetigenshiler, «ART laıf» baıanıster ansamblderi qurylǵan. Olar Túrkııa, Qyrǵyzstan, О́zbekstan elderinde ótken halyqaralyq baıqaýlarda bas júlde jeńip alǵan.
El erteńi úshin mektep isi – ózekti másele. Onyń ishinde mektep-ınternat jaǵdaıy men tárbıesi maı shammen qaralady. Al shyǵarmashylyǵymen jurtty tánti etip júrgen jetkinshekter oqıtyn №3 arnaıy mektep-ınternaty buǵan basa nazar aýdarady. Bilim ordasynda múmkindigi shekteýli oqýshylardyń boıynda ulttyq qundylyqtarǵa negizdelgen adamgershilik tárbıe men adamı sezimdi qalyptastyrý jáne damytý máselesi alǵa qoıylǵan. Ár aptanyń juma kúni ulttyq kıim kııý dástúrge aınalǵan. Oqýshylardyń qyzyǵýshylyqtaryna qaraı ártúrli úıirme de bar. Úıirme nashar kóretin oqýshylarǵa qazaqtyń ulttyq mýzyka ónerin nasıhattap, emosııalyq sezimtaldyǵyn qalyptastyryp, bilimdi, mádenıetti bolyp ósýine kómektesedi.
Mektepte oqýshylardy shyǵarmashylyqqa tárbıeleý isi jaqsy jolǵa qoıylǵan. Mýzyka kabıneti ulttyq mýzykalyq aspaptarmen qamtylǵan. Mýzyka páni boıynsha mektep janynan «Sulý saz» etno-folklorlyq ansambli, «Syrǵalym» jetigenshiler ansambli, «Art Laıf» baıanıster ansambli, «Asyl mura» dombyrashylar ansamblderi jáne qobyz, sazsyrnaı, basdombyra, shanqobyz, saksafon úıirmeleri ashylǵan. Bul týraly «Mýzykanyń áseri jasóspirimge dúnıeni jan-jaqty tanyp-bilýge kómektesedi, balanyń oıyna azyq berip, keńinen jáne ádetten tys oılaýǵa úıretedi, halyqtyń rýhanı mádenıetine jaqyndastyra otyryp, patrıotızm sezimin tárbıelep, adamgershilik jáne azamattyq belsendiligin oıatady», deıdi úıirme qatysýshysy Smaǵulov Dáýlet.
Mektep túlekteri jyl saıyn UBT-ny sátti tapsyrady. Aldyńǵy 2022-2023 oqý jylynda ortasha 92,5 balmen tapsyryp, memlekettik grant ıegerleri atanyp, joǵary oqý oryndaryna tústi. №3 arnaıy mektep-ınternat 1979 jyly quryldy. Qazir 25 oqý kabıneti bar. Sondaı-aq pándik kabınetter, psıholog kabıneti, kórý qabiletin túzetý, emdik deneshynyqtyrý, uldar men qyzdarǵa arnalǵan tehnologııa kabınetteri, oıyn, saltanat zaly bar. Munda 43 muǵalim jáne 21 tárbıeshi qyzmet etedi, 139 oqýshy bilim alady. Nashar kóretin jáne zaǵıp balalar mektep-ınternatta 6 jastan bastap 18 jasqa deıin bilim alady.