Premer-mınıstr Oljas Bektenov ıtalııalyq ENI kompanııasynyń tabıǵı resýrstar bólimshesiniń barlaý jáne óndirý jónindegi dırektory Lýka Vınıatımen energetıka salasyndaǵy yntymaqtastyq máseleleri jóninde kezdesý ótkizdi.
Kezdesýde Qarashyǵanaq jáne Qashaǵan ken oryndaryndaǵy birlesken jumys barysy qaralyp, sondaı-aq jańartylatyn energııa kózderi salasyndaǵy jańa jobalardy iske qosý máseleleri talqylandy.
Taraptar Qarashyǵanaqty keńeıtý jobasynyń josparǵa saı iske asyrylyp jatqanyn atap ótti. Búgingi tańda óndiristi jylyna 11 mln tonna deńgeıinde ustap turý úshin shıki gazdy keri aıdaıtyn qosymsha 5-6 kompressordy iske qosý úderisi jalǵasyp jatyr. Qýaty jylyna 4 mlrd m3 bolatyn gaz óńdeý zaýytyn salý jobasy belsendi túrde iske asyrylyp, jańa kásiporyn halyqty tıimdi baǵadaǵy taýarlyq gazben qamtamasyz etýge múmkindik beredi.
Qashaǵan ken ornyn tolyq kólemde ıgerý jumystary ýaqtyly júzege asyrylýda jáne Úkimettiń erekshe baqylaýynda tur. Taraptar sondaı-aq aldaǵy gaz óńdeý zaýytynyń qurylysyna qatysty ózge de máselelerdi talqylady.
Kelissóz barysynda Qazaqstanda jańartylatyn energııa kózderi salasyndaǵy jobalardy iske asyrýda ENI kompanııasymen yntymaqtastyqtyń oń tájirıbesine erekshe nazar aýdaryldy. Atap aıtqanda, Aqtóbe oblysynda «Badamsha-1», «Badamsha-2» jel elektr stansalarynyń, Túrkistan oblysynda «Sháýildir» kún elektr stansasynyń iske qosylýy sóz boldy. Aldaǵy kezeńde jumystar Mańǵystaý oblysynda jalpy qýaty 247 MVt bolatyn JEK jáne tabıǵı gazben jumys isteıtin gıbrıdti aralas elektr stansasyn birlesip salýǵa baǵyttalady. Bul óndiristegi apatty jaǵdaılardyń aldyn alýǵa múmkindik beredi.
Úkimet basshysy Qarashyǵanaq pen Qashaǵandaǵy jobalardy iske asyrý kezinde taýarlardy, jumystar men qyzmetterdi satyp alýdaǵy qazaqstandyq qamtý úlesin arttyrýdyń mańyzyn atap ótti.
Kezdesý qorytyndysynda qatysýshylar uzaqmerzimdi yntymaqtastyqty odan ári damytýǵa nıetti ekenderin rastady.