Senator Bekbol Orynbasarov azamattardan túsken aryz-shaǵymdardy taldaý negizinde Úkimet basshysyna depýtattyq saýalyn joldap, kádege jaratý tólemin, kedendik baj salyǵyn jáne kólikti tirkeýge alym mólsherin tómendetýdi usyndy, dep jazady Egemen.kz Úkimettiń baspasóz qyzmetine silteme jasap.
Importtyq kólikterdiń baǵasy el azamattarynyń basym kópshiligi úshin tym qymbat. Oǵan kedendik baj salyǵy, kádege jaratý jáne bastapqy tirkeýge tólenetin tólemder sebep bolyp otyr. Bekbol Orynbasarov depýtattyq saýalynda elimizdiń kólik parkin jańartýdaǵy túıtkilderge toqtaldy.
Senatordyń aıtýynsha, depýtattarǵa azamattardan kedendik baj salyǵy, kádege jaratý normalary jáne basqa elderden ákelinetin kólikterdi tirkeý máselelerine qatysty ótinishter jıi túsip turady. Senatorlar Úkimetke birneshe ret depýtattyq saýal joldaǵanymen, eki tarapty da qanaǵattandyratyn naqty ekonomıkalyq mindetter men ǵylymı tujyrymdarǵa negizdelgen sheshim áli usynylmady. Nátıjesinde qarapaıym azamattar úshin kólik satyp alý qoljetimsiz bolyp ketken.
Osy oraıda senator jeńildetilgen avtonesıe baǵdarlamasy halyqty jańa kóliktermen qamtamasyz etý maqsatyna jete almaǵanyn aıtyp, jańa ári sapaly kólikterdiń joqtyǵy avtokólikterdi zańsyz jolmen tirkeý oqıǵalaryna sebep bolǵanyn alǵa tartty.
«Qozǵaltqysh kólemi eki myń tekshe santımetrge deıingi, shyqqanyna úsh jyldan aspaǵan avtomobılder úshin kádege jaratý alymynyń mólsherin 150 000 teńgeden aspaıtyndaı etip qaıta qaraýdy suraımyn. Kedendik bajdy esepteý kezinde kedendik tordy azaıtý jaǵyna qaraı qaıta qaraý kerek. Avtokólikter Qytaıdan Qazaqstanǵa Qyrǵyz Respýblıkasy arqyly ákelinetin faktiler tym jıilep ketti, óıtkeni avtokólik ıeleri QQS pen bajdy bizdiń memleketimizge qaraǵanda birneshe ese az tóleıdi. Shyǵarylǵan jylyn qosa alǵanda, bes jylǵa deıin kólik quraldaryn memlekettik tirkegeni úshin alym mólsherlemesin 0,25 AEK kóleminde qarastyrýdy usynamyn. Atalǵan usynystar Qazaqstan azamattaryna sapaly jáne qoljetimdi avtokólik alýǵa múmkindik beredi dep senemiz», dep qorytyndylady Bekbol Orynbasarov.
Qyrmyzy JUMAǴALIQYZY,
EUÝ stýdenti