19-21 sáýir aralyǵynda Qyrǵyzstannyń bas shahary Bishkekte jalaýy jelbireıtin Azııanyń lısenzııalyq týrnırinde kúsh synasatyn balýandardyń esimderi belgili boldy.
Grek-rım kúresinen ótetin jarysta Aıdos Sultanǵalı (60 kg), Meıirjan Shermahanbet (67 kg), Demeý Jadyraev (77 kg), Oljas Syrlybaı (97 kg) jáne Álimhan Syzdyqov (130 kg) óner kórsetedi. Bul jigitterdiń barlyǵy da – myqtylyǵyn áldeqashan moıyndatqan marqasqalar. Árqaısyna jeke-jeke toqtalsaq, 28 jastaǵy Aıdos 2018 jáne 2022 jyldary álem chempıonatynda qola medaldy ıelenip, 2021 jyly Azııa chempıony atandy. Bıyl Astanada shymyldyǵy túrilgen Qazaqstan chempıonatynda ol óziniń basty qarsylasy Meırambek Aınaǵulovtan aılasyn asyrdy.
27 jastaǵy Meıirjan 2018 jylǵy dúnıejúzilik dodada qola alsa, 2022 jylǵy qurlyq birinshiliginde bas júldeni oljalady. Azııa oıyndaryn kúmis medalmen qorytyndylady. Demeýdiń jasy 35-ke tap qalsa da, ol – áli de babynda. Ardager balýannyń sońǵy el chempıonatyndaǵy óreli óneri – osy sózimizdiń aıqyn dáleli. Jadyraev sol jarystyń fınalynda elimizdiń taǵy bir beldi balýany Temirlan Shadýkaevqa shań qaptyrdy. Sondaı-aq ol 2017 jyly álem jáne 2015 pen 2018 jyldary Azııa chempıonattarynda júldegeler sanatyna qosyldy. Al Oljas pen Álimhan – qurlyqtyq deńgeıdegi dodalarda daralanyp júrgen dúldúlder.
Erkin kúresten saıysqa túsetin Nurqoja Qaıpanov (74 kg), Álisher Erǵalı (97 kg) jáne Iýsýp Batyrmurzaevtyń (125 kg) esimi sportsúıer qaýymǵa jaqsy tanys. 25 jastaǵy Nurqoja – 2019 jylǵy álem chempıonatynyń kúmis júldegeri, Azııanyń eki dúrkin chempıony. 27 jastaǵy Iýsýp – Azııa chempıony. 24 jastaǵy Álisher qurlyq birinshiliginde tórt ret júldeli oryndy oljalady. Sonymen qatar Erǵalı men Batyrmurzaev Tokıo Olımpıadasynda baq synady. Al Erasyl Muhtaruly (57 kg) men Maıys Álıev (65 kg) Astanadaǵy el chempıonatynda qarsylas shaq keltirgen joq. Fınalda ekeýi de óte myqty balýandardan basym tústi. Atap aıtsaq, Erasyl Rahat Qaljandy utsa, Maıys Sanjar Muhtarǵa san soqtyrdy.
Osyǵan deıingi jarystarda Qazaqstannyń ulttyq quramasynyń músheleri Olımpııa oıyndarynyń eki joldamasyn oljalady. Onyń ıegerleri – Nursultan Tursynov (grek-rım kúresi, 87 kg) pen Azamat Dýletbekov (erkin kúres, 86 kg). Al qyzdardyń qorjyny ázirge bos. Sol olqylyqtyń ornyn toltyrý úshin jeti burymdymyz Bishkekke attanyp barady. Olar – Laýra Ǵanıkyzy (50 kg), Juldyz Eshimova (53 kg), Emma Tısına (57 kg), Irına Kýznesova (62 kg), Elena Shalygına (68 kg) jáne Jámıla Baqbergenova (76 kg).